Azərbaycan, Bakı, 15 yanvar / Trend , müxbir B.Həsənov/ Azərbaycan ordusunun hərbi təchizatını daha da yaxşılaşdırmaq üçün Türkiyə ilə müştərək yeni layihələrin həyata keçirilməsi gözlənilir.
"Azərbaycandakı T - 72 tanklarının Türkiyənin "Aselsan" şirkəti tərəfindən modernləşdirilməsi
ilə bağlı, Müdafiə Nazirliyi ilə danışıqlar aparılır", - deyə "Aselsan - Bakı" hərbi - sənaye şirkətinin direktoru Sərdar Sezmener cümə axşamı Trend -a bildirib.
Trend - un arayışı: Azərbaycan 2009-cu ilin dövlət büdcəsindən müdafiə və təhlükəsizlik sahəsinə iki milyard manatdan çox (2,5 milyard dollara yaxın) maliyyə vəsaiti ayırıb. 2008 - ci ildə Azərbaycanın müdafiə və təhlükəsizlik xərcləri 1,5 milyard manat (1,850 milyon dollar) olub.
"Aselsan" Türkiyə Silahlı Qüvvələrinin rabitə cihazları ehtiyaclarını təmin etmək məqsədilə 1975-ci ildə yaradılmış hərbi - sənaye şirkətidir. Hərbi məqsədlərlə istifadə olunan bir çox elektron cihazlar istehsal edən "Aselsan" öz məhsullarını, ABŞ, Hollandiya, Pakistan və Malayziya da daxil olmaqla, dünyanın bir çox ölkəsinə ixrac edir. "Aselsan" hərbi məqsədlərlə istifadə olunan malların keyfiyyətinə görə dünyanın ən yaxşı 33 - cü şirkətidir.
Sezmener, Azərbaycan Müdafiə Nazirliyi ilə razılaşma əldə olunacağı təqdirdə, tankların modernləşdirilməsinin Bakıda həyata keçiriləcəyini bildirib. Onun sözlərinə görə, modernləşdirmədən sonra tankların döyüş qabiliyyəti xeyli artacaq.
" Modernləşdirmə nəticəsində tanklar gecə görmə cihazları ilə təmin ediləcək və qaranlıqda 3500 metrədək məsafədə hədəfi aydın görmək mümkün olacaq", - deyə Sezmener bildirib.
Atəş nəzarət sistemlərinin tamamilə kompüterleşdirilməsi nəzərdə tutulur.
"Modernləşdirmə həyata keçirildikdən sonra, hədəfin koordinatlarının muəyyənləşdirilməsi, sursatın seçilməsi və atəş açılması kompüter sistemi tərəfindən həyata keçiriləcək", - deyə o əlavə edib.
Sezmener yaxın günlərdə daxili qoşunların gecə görmə cihazları ilə təmin edilməsini nəzərdə tutan müqavilə imzaladıqlarını və bu cihazların tezliklə Azərbaycanın Daxili Qoşunlarına çatdırılacağını da deyib.
Şirkət rəhbəri "Aselsan"ın Azərbaycan Silahlı Qüvvələrini, əsasən, orduda istifadə olunan simsiz rabitə cihazları ilə təmin etdiklərini bildirib.
Onun sözlərinə görə, bu yaxınlarda Azərbaycan Müdafiə Nazirliyinə hərbi əməliyyatlar əsasında əsgərlərin fərdi istifadəsi üçün nəzərdə tutulan simsiz rabitə cihazları təhvil verilib. "Hərbi əməliyyatlarda çox səssiz hərəkət etməyi və əsgərlərə əmrləri daha operativ catdırmağı təmin edən bu cihazlar texnologiyanın son nailiyyətlərinin tətbiq edildiyi əvəzedilməz cihazdir",- deyə Sezmener qeyd edib.
"Aselsan" ilə Müdafiə Nazirliyi arasında imzalanmış müqaviləyə əsasən, orduda simsiz məxfi əlaqəni təmin edən müasir cihazların yaxın günlərdə Azərbaycan ordusuna çatdırılması da gözlənilir. Bu cihazların əsas xüsusiyyəti yalnız Azərbaycana məxsus şifrə sistemləri ilə təchiz edilməsidir. "Başqa heç bir ölkədə bu rabitə sistemlərinin şifrəsini açmaq mümkün deyil", - deyə Sezmener vurğulayıb.
"Aselsan - Bakı" rəhbərinin sözlərinə görə, bu cihazların yaxın gələcəkdə Azərbaycanla müştərək istehsalı da planlaşdırılır. Sezmener bildirib ki, hazırda hərbi - sənaye məhsullarının müştərək istehsalı sahəsində əməkdaşlığın perspektivləri araşdırılır.
"Bu yaxınlarda Turkiyənin Müdafiə Nazirliyi nəzdindəki müdafiə sənayesi müşavirliyinin rəhbərliyi Bakıda olub. Nümayəndə heyəti Azərbaycanın müdafiə sənayesi naziri ilə görüşüb . Tərəflər Alov, Ozon və Maşınqayırma zavodlarında müdafiə sənayesi məhsullarının Türkiyə ilə müştərək istehsalı imkanlarını araşdırıblar. Bu istiqamətdə işlər davam etdirilir", - deyə Sezmener bildirib.
Müəlliflə əlaqə saxlamaq üçün elektron ünvan [email protected]
