Azərbaycan, Bakı, 26 yanvar / Trend , muxbir A.Hüseynbala/ Azərbaycanın müxalifət partiyasının lideri hesab edir ki, cəmiyyətinin bütün fəal təbəqələrinin siyası cəhətdən maarifləndirilməsinə ciddi ehtiyac var.
"Siyasi partiyalar bu prosesi ilk növbədə öz üzvlərindən başlamalıdır. Bundan sonra cəmiyyətin maarifləndirilməsi prosesi sürətlədirilməlidr", - bazar ertəsi Trend -a Azərbaycan Milli İstiqlal Partiyasının (AMİP) lideri Etibar Məmmədov bildirib.
Trend -un arayışı: Etibar Məmmədov 2004-cü ilin sonunda partiyanın sədrliyindən istefa verdikdən sonra partiya daxilində parçalanma baş verib. Ondan sonra AMİP-in sədri olan Əli Əliyevə qarşı partiya daxilində narazılıq yarandığı zaman partiya üzvlərinin bir qismi AMİP-dən gedib. Sədrliyə gələn Ayaz Rüstəmov isə partiya üzvlərinin narazılığından sonra vəzifəsindən istefa verib. Hazırda partiyanın sədr postu boşdur.
АMİP 1992-ci ildə yaradılan və Azərbaycanda ilk dövlət qeydiyyatına alınan partiyadır. Etibar Məmmədov hazırda Beynəlxalq Demokrat İttifaqının (BDİ) sədr müavinidir.
Məmmədovun fikrincə, indi cəmiyyətin maarifləndirilməsi çox aşağı səviyyədə gedir: "Həm hakimiyyətdə, həm də müxalifətdə olan partiya üzvləri arasında sorğu keçirilərsə, onların əksəriyyəti bu seçimi nəyə görə etdiklərini izah edə bilmirlər", - Məmmədov vurğulayıb.
Onun sözlərinə görə, insanların əksəriyyəti ya liderlərin xatirinə, ya da hakimiyyətdən narazı olduqları üçün partiyalara üzv yazıldıqlarını deyirlər: "İnsanların siyasi mənsubiyyətinin göstəriciləri haqqında məlumatları aşağı səviyyədədir", - AMİP lideri bildirib.
Azərbaycanın müxalif partiyasının lideri bundan sonra fəal siyasi fəaliyyətlə məşğul olacağını da mümkün hesab etmir: "Mən partiyaya sədr seçilməsi məsələsinə müdaxilə etmirəmsə, deməli fəal siyasl fəaliyyətə yenidən qoşulmaq haqda da düşünmürəm", - Məmmədov əlavə edib.
Məqalə müəllifi ilə əlaqə ünvanı: [email protected]