Əfqanıstan, Kabil, 26 yanvar / Trend , müxbir A.Həkimi/ Əfqanıstanın narkotiklərlə mübarizə üzrə naziri bildirib ki, Əfqanıstanda narkotik vasitələrə qarşı mübarizə aparmaq ən böyük problem və ən qorxulu işdir.
"Əfqanıstan hökumətinin səyləri nəticəsində narkotik maddələrin əkilməsi və istehsalı azalsa da, hələ də narkotiklərlə mübarizə ölkənin ən əsas problemlərindən və ən qorxulu işlərdəndir",-deyə Əfqanıstanın narkotiklərlə mübarizə üzrə naziri, general Xudadad Trend -a müsahibəsində bildirib.
Xudadad əlavə edib ki, gələn il yeni layihəyə əsasən, nazirlik 27500 hektar ərazini narkotik maddələrin əkinindən təmizləyəcək.
Əfqanıstan prezidenti Hamid Kərzai, ölkə parlamentində çıxışı zamanı bildirib ki, narkotiklərlə mübarizə Əfqanıstanın ən əsas problemlərindəndir və beynəlxalq aləmdə ölkənin adının ləkələnməsinə səbəb olur.
"Cari ildə narkotik maddələrin əkilməsi Əfqanıstanda 19 faiz azalıb, beynəlxalq ictimaiyyət və hökumətin səyi nəticəsində bu rəqəmin sıfıra enəcəyinə ümid etmək olar",-deyə Xudadad bildirib.
Dünyada ən çox narkotik maddə istehsal edən ölkələr arasında Əfqanıstan birinci yeri tutur. Beynəlxalq təşkilatların məlumatına əsasən, dünyada istehsal olunan narkotik maddələrin 90 faizi Əfqanıstanda istehsal olunur. Lakin prezident Kərzainin sözlərinə görə, hökumətin nəzarəti altında olan ərazilərdə narkotik maddələr əkilmir.
Xudadad bildirib ki, nazirliyin yeni layihəsinə əsasən, milli ordu və polis narkotiklərlə mübarizədə birgə işləyəcəklər.
O əlavə edib ki, NATO qüvvələrinin narkotik maddələrin istehsal mərkəzlərini və eləcə də qaçaqmalçılığın qarşısını almaqda bizi dəstəkləyəcəyinə ümid edirəm.
Statistik məlumata əsasən, Narkotiklərlə Mübarizə Nazirliyi cari ildə 190 nəfəri narkotik maddələrin qaçağı ilə məşğul olduğu üçün həbs edərək məhkəmə orqanlarına təhvil verib.
"Əfqanıstan hökuməti cari ildə ötən illərlə müqayisədə narkotiklərlə mübarizə sahəsində çoxlu nailiyyətlər əldə edib",-deyə Əfqanıstan ədliyyə nazirliyinin sözçüsü Sərir Əhməd Bərmək bildrib.
Bərmək əlavə edib ki, ötən il Narkotiklərlə Mübarizə Nazirliyi ölkənin müxtəlif regionlarından, 2228 kq heroin, 19228 kq tiryək, 30000 kq-dən artıq həşiş, 63 kq morfin və 4961 kq alüminium xlorid (aluminium chloride) müsadirə olunub.
Alüminium xlorid kimyəvi maddəsindən heroinin istehsalında istifadə olunur. Bu maddə Əfqanıstana qaçaqçılar vasitəsi ilə qonşu ölkələrdən idxal olunur.
Əfqanıstan hökuməti və beynəlxalq ictimaiyyət narkotik maddələri terroristlər, Taliban və hökumətə müxalif qüvvələrin ən əsas gəlir mənbəyi hesab edirlər.
Rəsmi statistikaya əsasən, Taliban qrupu narkotik maddələrin ticarətindən hər il 100 milyon dollardan artıq gəlir əldə edir.
Ekspertlərin fikrincə Əfqanıstanda narkotik maddələrin qaçağı mafiyaları çox geniş inkişaf edib belə ki, hətta hökumət rəsmiləri də bu mafiyalarla əlbirdir. Onlar hesab edir ki, bəzi hökumət rəsmilərinin bu mafiyalarla əlbir olması hökumətin narkotiklərlə mübarizədə ən əsas problemlərindəndir. Digər tərəfdən, Əfqanıstanda əkilən narkotik maddələrin istehsalını dəstəkləyən quruplar beynəlxalq narkotik maddə mafiyasıdır və hökumət hazırda onlarla mübarizə iqtidarında deyil.
"Narkotik maddələr Əfqanıstanda əkilir, lakin onun qaçağı və dünya bazarlarına çıxarılmasını Avropa və ABŞ qaçaqçıları həyata keçirir", - deyə Əfqanıstan senasının sədri Sibqətullah Mücəddədi bildirib.
Mücəddədi dünya ölkələrini böyük narkotik maddə mafiyalarının məhvi üçün ciddi addımlar atmağa çağırıb.
