Azərbaycan, Bakı, 17 fevral / Trend , müxbir A.Hüseynbala/ Azərbaycanın hakim partiyası referendumla bağlı təşviqat kampaniyasının strategiyasında dəyişiklik edib.
"Biz strategiyanı bir qədər dəyişərək təşviqat kampaniyasını referendumun xüsusiyyətinə uyğun qurmuşuq", - çərşənbə axşamı Trend -a referendumla bağlı Yeni Azərbaycan Partiyası (YAP) icra katibinin müavini, millət vəkili Siyavuş Novruzov bildirib.
Onun sözlərinə görə, referendumla bağlı təşviqat kampaniyasına fevralın 19-da böyük toplantı keçirilməklə başlanılacaq. "Yeni Azərbaycan" təşviqat qrupu kampaniya dövründə qanunvericiliyin imkan verdiyi bütün tədbirləri keçirmək niyyətindədir.
Тrend News-un arayışı: Təşviqat qrupları fevralın 18-dən etibarən təbliğat kampaniyasına start verəcəklər. Referendumla bağlı qəbul olunmuş təqvim planına əsasən, təbliğat kampaniyası martın 16-da saat 24:00-da başa çatdırılmalıdır.
Martın 18-də Azərbaycanda ölkə Konstitusiyasına əlavə və dəyişikliklərin edilməsi üzrə referendum keçiriləcək.
Referendum üzrə "Yeni Azərbaycan", "Şəhər", "Tərəqqi", "Hüquq və demokratiya", "Vətəndaş Cəmiyyəti", "Davamlı İnkişaf Naminə", "Zəka", "Qarabağ və Respublika Uğrunda Hərəkat" və "Respublikaçılar" təşəbbüs qrupları MSK-da təşviqat qrupları kimi qeydiyyata alınıblar. "Abad kənd", "Azad söz", "Azərbaycan Xalq Cümhuriyyəti" və "Milli İstiqlal" təşəbbüs qrupları qeydiyyatdan keçməyib. Azərbaycan Konstitusiyası 1995-ci ildə qəbul olunub, 2002-ci ildə Əsas Qanuna dəyişikliklər edilib.
YAP adətən seçkilərdə təşviqat kampaniyalarına mitinqlə start verib.
Novruzovun sözlərinə görə, təşviqat kampaniyasına həmişəki kimi mitinqlə başlanılmamasının səbəbi hər səsvermənin özünəməxsus xüsusiyyətinin olması ilə bağlıdır.
Hakim partiyanın icra katibinin müavini bildirib ki, təşviqat kampaniyası zamanı mitinqlərin keçiriləcəyi də istisna deyil.
YAP 1992-ci ildə о zaman Naxçıvan Ali Məclisinin sədri olan Heydər Əliyev tərəfindən yaradılıb. Azərbaycanda 16 ildir hakim partiya olan YAP-ın indiki sədri ölkə başçısı İlham Əliyevdir.
Məqalə müəllifi ilə əlaqə ünvanı:[email protected]
