Azərbaycan, Bakı, 18 mart / Trend , müxbir K.Zərbalıyeva /
Azərbaycan Mərkəzi Seçki Komissiyası (MSK) referendumun keçirilməsindən razı qalıb.
"Səsvermə günü hər hansı şikayət daxil olmayıbsa, yüksək seçici fəallığı qeydə alınıbsa, demək, referendumun nəticəsindən razı qalmalıyıq", - Trend -un məlumatına görə, bu barədə səsvermə yekunlaşandan sonra jurnalistlərə açıqlamasında MSK katibi Natiq Məmmədov bildirib.
Məmmədov deyib ki, indiyədək referendumla bağlı rəsmi şikayət daxil olmayıb. Yalnız 6 müraciət daxil olub ki, bu da məntəqələrin yerinin öyrənilməsi ilə bağlı olub.
"Ümid edirəm ki, bundan sonra elə bir ciddi pozuntu olmayacaq", - Məmmədov əlavə edib.
Çərşənbə günü Azərbaycanda Konstitusiyanın 29-cu maddəsinə əlavə və dəyişikliklərin edilməsi məsələsi üzrə referendum keçirilib. Səsvermə 19:00-da başa çatıb. 17:00-a olan məlumata görə, Azərbaycanda seçicilərin 64,12 faizi (3 137 851 seçici) iştirak edib.
Referendumda, xüsusilə, Azərbaycan Konstitusiyasının 101-ci maddəsinin beşinci bəndində yer alan "heç kim iki dəfədən artıq AR-nın prezidenti seçilə bilməz" hazırkı redaktəsinin "müharibə şəraitində aparılan hərbi əməliyyatlar növbəti seçkilərin keçirilməsini mümkünsüz edirsə, fəaliyyətdə olan dövlət başçısının səlahiyyət müddətinin hərbi əməliyyatlar bitənədək artırılmasını" nəzərdə tutan redaktə ilə əvəzlənməsi nəzərdə tutulur. Azərbaycan Prezidentinin səlahiyyət müddəti beş ildir. Hazırda dövlət başçısı olan İlham Əliyev 2003 və 2008-ci illərdə prezident seçilib.
Ümumilikdə ölkə Konstitusiyasının 29 maddəsinə 41 dəyişiklik edilməsi planlaşdırılır. Bura, o cümlədən hərbi əməliyyatlar aparılan zaman ölkə parlamentinə seçkilərin ertələnməsi, 40 min seçiciyə qanunvericilik təşəbbüsü hüququ verilməsi, şəxsin istəyinə qarşı video və ya audio yazılışların aparılması və onun şəkilinin çəkilməsinə qadağa qoyulması, Azərbaycanın sabiq prezidentlərinin maddi təminatı, eləcə də texniki xarakterli müddəаlar daxildir.
Azərbaycan Konstitusiyası 1995-ci ildə qəbul olunub, 2002-ci ildə Əsas qanuna əlavə və dəyişikliklər edilib
Məqalə müəllifi ilə əlaqə ünvanı: [email protected]
Azərbaycan Mərkəzi Seçki Komissiyası referendumun keçirilməsindən razı qalıb
