Azərbaycan, Bakı, 10 iyun / Trend , müxbir H.Bağırov /
Bakıda on ildən çox müddət ərzində silahlı basqınlar törətməkdə ittiham olunan daxili işlər orqanlarında məsul vəzifələrdə çalışmış Mehdi Əmirəliyev və daha beş nəfərin cinayət işi baxılması üçün məhkəməyə göndərilib.
Ağır Cinayətlərə Dair İşlər üzrə Məhkəmədən çərşənbə günü Trend -a verilən məlumata görə, iş üzrə məhkəmənin hazırlıq iclası iyunun 12-də hakim Əlövsət Abbasovun sədrliyi ilə keçiriləcək.
Milli Təhlükəsizlik Nazirliyi əməkdaşlarının ötən il sentyabrın 26-da keçirdiyi əməliyyat tədbirləri nəticəsində Yasamal rayon Polis İdarəsində Banditizmə və Terrorizmə qarşı Mübarizə İdarəsində məsul vəzifələrdə, Nərimanov rayon Polis İdarəsinin 18-ci polis bölməsinin rəisi vəifəsində işləmiş Mehdi Əmirəliyev həbs edilib. Onunla bərabər əvvəllər daxili işlər orqanlarında yüksək vəzifə sahibi olmuş daha iki nəfər - İrac Nəsrullayev və Ceyhun Qarayev , Nərimanov rayon Polis İdarəsinin sabiq əməliyyatçısı Ramiz Musayev, polis əməkdaşları İsmayıl Feyziyev və Sirac adlı şəxslər də həbs edilib.
Təqsirləndirilən şəxslər Cinayət Məcəlləsinin quldurluq (181.2.1, 181.2.3, 181.2.4, 181.3.2, 181.2.5) madddəsi ilə ittiham olunurlar.
Polis dəstəsi 1998-2008-ci illər ərzində Bakı şəhərində fəaliyyət göstərən ayrı-ayrı valyutadəyişmə məntəqələrinə, həmçinin orada işləyən şəxslərə qarşı odlu silahla hədə-qorxu gələrək külli miqdarda gəlir əldə etmək məqsədilə çoxlu sayda quldurluq cinayəti törədiblər.
Məqalə müəllifi ilə əlaqə ünvanı: [email protected]
