Azərbaycan, Bakı, 23 iyun / Trend , müxbir A.Hüseynbala /
Azərbaycanda bələdiyyə seçkiləri ilə bağlı blok yaratmaq istəyən hakimiyyətyönlü partiyalar arasında fikir ayrılığı yaranıb.
"Mübarizlər Partiyası blokda təmsil olunmağa razılaşsa da, bələdiyyə üzvlüyünə namizədləri müstəqil şəkildə irəli sürmək niyyətindədir", - çərşənbə axşamı Trend -a "Demokratik seçki bloku" təsis etmək təşəbbüsü ilə çıxış edən Respublikaçılar Partiyasının sədri Sübut Əsədov bildirib.
Trend -un arayışı: Ötən ay Azərbaycan parlamentində "Bələdiyylərin birləşdirilməsi haqqında" qanun qəbul edilib. Qəbul edilən qanuna görə, Azərbaycanda bələdiyyələrin sayı 2757-dən 1766-ya enəcək.
Azərbaycanda bələdiyyə seçkisi 2009-cu ilin dekabrında, parlament seçkisi isə 2010-cu ilin payızında keçirilməlidir. Bundan əvvəl iki dəfə - 1999 və 2004-cü illərdə yerli özünüidarəetmə orqanlarına seçkilər keçirilib.
Əsədovun sözlərinə görə, blokda təmsil olunacaq digər partiyalarla məsləhətləşmələr bu həftənin sonuna qədər başa çatdırılmalıdır. "Demokratik Azərbaycan Dünyası, Azad Respubliakçılar, Milli Dövlətçilik partiyaları və biz, blokda təmsil olunan partiyaların bələdiyyə üzvlüyünə vahid namizədlərinin siyahısının müəyyənləşdirilməsinə razıyıq", - partiya sədri əlavə edib.
Onun fikrincə, Mübarizlər Partiyasının bələdiyyə seçkilərində müstəqil şəkildə iştirak etməsi həmin partiyanın blokda təmsil olunmasına problem yaratmayacaq. "Düşünürəm ki, biz blok olaraq həm vahid siyahı ilə həm də həmin partiyanın irəli sürdüyü bütün namizədləri birgə dəstəkləyə biləcəyik", - Əsədov vurğulayıb.
Partiya sədri deyib ki, hazırda partiyaların hər biri bələdiyyəyə irəli sürüləcək namizədlərin siyahısını müəyyənləşdirir. "Bundan sonra biz birgə müzakirə nəticəsində vahid siyahını hazırlayacaq və blokun təsis olunmasını elan edəcəyik", - Əsədov qeyd edib.
Məqalə müəllifi ilə əlaqə ünvanı: [email protected]
