Azərbaycan, Bakı, 11 avqust / Trend , müxbir C.Babayeva /
Azərbaycanın "Dalğa" gənclər hərəkatı tam fəaliyyətini qurultaydan sonra bərpa edəcək.
"Qurultayın oktyabr-noyabr ayılarında keçirilməsi nəzərdə tutulub. Qurultaya hazırlıq məqsədi ilə təşkilat komitəsi yaradılıb. Hərəkat hazırda bütün səylərini gənc fəallar Adnan Hacızadə və Emin Millinin azadlığa buraxılmasına nail olmaq üçün səfərbər edib. Təşkilat həmçinin ofis və digər texniki problemlərin həlli ilə məşğuldur", - çərşənbə axşamı Trend -a "Dalğa" gənclər hərəkatının ilk sədri və fəalı Ramin Hacılı məlumat verib.
Hacılı bildirib ki, hərəkat yeni ofis axtarışındadır. "Qısa vaxt ərzində ofislə bağlı və digər texniki problemlər həll olunacaq", - o deyib.
Onun sözlərinə görə, hərəkat sədrliyinə namizədliyini irəli sürmək niyyətində olanlar var. "Hərəkatın sıralarında sədrliyə layiq bir sıra gənc var. Sədrliyə namizədlər qurultaya bir ay qalmış irəli sürüləcək. Hesab edirəm ki, hərəkata yeni sədr seçkisi kifayət qədər gərgin keçəcək", - Hacılı deyib.
Hacılı sədrliyə namizədliyini irəli sürmək niyyətində olmadığını bildirib.
Trend -un arayışı: "Dalğa" gənclər hərəkatı 2005-ci ildə yaradılıb. Hərəkatın sıralarında 250 gənc var. Təşkilatın sədri Vəfa Cəfərova bu ilin iyulunda istefa verib. Cəfərova bildirib ki, hərəkat tələbə təşkilatı olduğundan artıq özünü onun sıralarında görmür. O, "Dalğa" gənclər hərəkatına 2007-ci ildə sədr seçilmişdi.
Məqalə müəllifi ilə əlaqə ünvanı: [email protected]
