Azərbaycan, Bakı, 27 avqust / Trend , müxbir C.Babayeva /
Azərbaycanın altı müxalifət partiyasının təmsil olunduğu Qarabağ və Respublika Uğrunda Hərəkat Seçki Məcəlləsindəki bəzi maddələrlə bağlı şərh almaq üçün Mərkəzi Seçki Komissiyasına müraciət edəcək.
"Seçki Məcəlləsi siyasi partiyaların blok şəklində seçkilərdə iştirakını məhdudlaşdırır. Seçki prosesinə qoşulan siyasi partiyalarla siyasi blokda seçkiyə qatılmaq istəyən tərəflər qanun vasitəsilə müxtəlif vəziyyətlərə salınır. Bu həftə Mərkəzi Seçki Komissiyasının seçkidə iştirak formasını şərtləndirən maddələrlə bağlı izahatlar verməsi üçün müraciət olunacaq", - cümə axşamı Trend -a Qarabağ və Respublika Uğrunda Hərəkatda təmsil olunan Vətəndaş və İnkişaf Partiyasının (VİP) sədri Əli Əliyev bildirib.
Trend -un arayışı: Qarabağ və Respublika Uğrunda Vətəndaş Hərəkatı bu ilin martın 18-də keçirilmiş referndum ərəfəsində yaradılıb. Hərəkatda Azərbaycan Xalq Cəbhəsi, Müsavat, Vətəndaş və İnkişaf, Liberal, Demokrat, Ümid partiyaları və bir neçə ictimai təşkilat təmsil olunur.
Azərbaycanda bələdiyyə seçkisinin bu ilin dekabrın ortalarında keçirilməsi gözlənilir.
VİP sədrinin sözlərinə görə, siyasi blok halında seçkiyə qatılmağın ağır şərtləri var. "Blok şəklində seçkilərə qatılmaq daha böyük maddi resurs, insan potensialı və vaxt itkisi tələb edir. Qanunun maddələrindən belə çıxır ki, bir partiya üzvləri seçkiyə daha asan şərtlərlə qatıla bilir, eyni statuslu partiyaların birləşib seçkidə iştirakı üçün isə daha ağır şərtlər irəli sürülür. Mərkəzi Seçki Komissiyasının maddələri şərhindən sonra hərəkat bələdiyyə seçkisində iştirak forması ilə bağlı qərar qəbul edəcək", - Əliyev deyib.
Məqalə müəllifi ilə əlaqə ünvanı: [email protected]
