Azərbaycan, Bakı, 27 yanvar / Trend , müxbir S.Ağayeva/
Azərbaycan və Kuba arasında iqtisadi, humanitar və mədəni sahələrdəki əməkdaşlığın perspektivləri 3-8 mart tarixlərində birgə komissiyanın üçüncü iclası çərçivəsində Havanada müzakirə ediləcək. Bu barədə Kubanın Azərbaycandakı səfiri Marselo Kabalyero Torres Trend -a bildirib.
Səfir deyib ki, iclas zamanı iqtisadi və ticari əlaqələrə yeni stimul veriləcək.
Onun sözlərinə görə, bu istiqamətdə iqtisadi əlaqələrin inkişafı üçün böyük işlər görmək lazımdır. "Bu problemi həll etmək üçün 2007-ci ildən etibarən iki ölkə arasında əməkdaşlıq üzrə birgə hökumət komissiyasının iş mexanizmləri fəaliyyət göstərir. O vaxtdan bəri biz iki iclas keçirmişik, mədəniyyət, turizm və idman sahələrində əməkdaşlığa dair üç mühüm saziş imzalamışıq. Energetika, səhiyyə, kommunikasiya və kənd təsərrüfatı kimi sahələrdə əməkdaşlığa dair 10 saziş də imzalanma prosesindədir", - diplomat deyib.
Səfir deyib ki, Kuba Azərbaycanda istehsal edilən avadanlıq və texnikada maraqlıdır. "Hazırda Kuba tərəfindən neft sənayesində istifadə edilən avadanlığın 70 faizi Azərbaycan mənşəlidir. Biz həmçinin qida və kənd təsərrüfatı məhsullarında da maraqlıyıq. Əməkdaşlığın digər mümkün istiqamətləri rabitə, səhiyyə və Kubanın tibb preparatlarıdır", - səfir deyib.
Səfirin sözlərinə görə, qarşılıqlı maraq doğuran sahələr kifayət qədərdir. Turizm, neft-qaz və informasiya sektoru, farmokologiya və səhiyyə, təhsil, idman və digər istiqamətlər iki ölkənin iqtisadi əlaqələrində daha perspektivli hesab edilir.
Komissiyanın işi çərçivəsində bu yaxınlarda Kubada Azərbaycan Mədəniyyəti Günləri keçiriləcək.
