Azərbaycan, Bakı, 2 fevral / Trend , müxbir R.Hafizoğlu/
Trend -un Yaxın Şərq redaksiyasının Mərakeş Krallığının Azərbaycandakı fövqəladə və səlahiyyətli səfiri Həsən Hami ilə müsahibəsi
- Cənab Səfir, məlumdur ki, Azərbaycana yeni təyin olunmusunuz. Azərbaycandakı fəaliyyətinizin nə kimi prioritetləri var?
- Hər şeydən əvvəl, sizə diqqətinizə görə minnətdarlığımı bildirmək istəyirəm. Bildiyiniz kimi, iki ölkə arasındakı əlaqələrin tarixi keçən əsrin 90-cı illərindən başlayır. O vaxtdan bu günə qədər iki ölkə arasında hər hansı bir problem qeydə alınmayıb. İki ölkə bir-birini müxtəlif məsələlərdə dəstəkləyir və hər iki ölkədə qarşılıqlı olaraq səfirliklərin açılması ölkələrimiz arasında yüksək səviyyəli əlaqələrin mövcudluğuna dəlalət edir. Bildiyiniz kimi, əvvəlcə 2006-cı ilin sentyabrında Azərbaycanın Mərakeş Krallığında səfirliyi açıldı, daha sonra 2008-ci ilin noyabrında krallığın Azərbaycanda səfirliyi açıldı. İnanıram ki, Azərbaycanda olmağım iki qardaş ölkə arasındakı əlaqələrin daha da inkişaf etdirilməsinə öz töhfəsini verəcək.
Krallığın Azərbaycanda səfirliyinin açılmasından öncə Ankaradakı səfirliyimizin Azərbaycan üçün də etimadnaməsi var idi və Azərbaycanlı bağlı işlər Ankarada aparılırdı.
- Bildiyimiz kimi, Ermənistanın Azərbaycana təcavüzü nəticəsində Dağlıq Qarabağ da daxil olmaqla Azərbaycan əraziləri işgal olunub. Rəsmi Rabatın Ermənistan-Azərbaycan münaqişəsi üzrə mövqeyi necədir?
- Mərakeş Krallığı Dağlıq Qarabağ problemində hər zaman Azərbaycanın yanında olub və Azərbaycanın ərazi bütövlüyünü dəstəkləyir. Eyni zamanda, Mərakeş Azərbaycan və Ermənistan arasında aparılan danışıqları və ATƏT-in Minsk qrupunun fəaliyyətini də yaxından izləyir. Ümid edirik ki, aparılan danışıqlar tez bir zamanda öz bəhrəsini verəcək və problem öz həllini tez bir zamanda tapacaq.
Əminliklə söyləyə bilərəm ki, Azərbaycanın sabitliyi bütün regionun sabitliyi üçün çox vacibdir.
- Ölkələrimiz arasında ticari və iqtisadi əməkdaşlıq hansı səviyyədədir? Mərakeş ticari və iqtisadi tərəfdaş kimi Azərbaycana nə təklif etməyə hazırdır, sizin ölkənizi Azərbaycanda nə maraqlandırır?
- Hər şeydən əvvəl ikitərəfli iqtisadi əlaqələrin olması və genişləndirilməsi üçün mövcud hüquqi bazaya nəzər salmaq lazımdır. Əslində, iki ölkə arasında bəzi iqtisadi layihələr üzrə sənədlər, xüsusilə də investisiyaların qarşılıqlı qorunması və stimullaşdırılması, ikiqat vergiqoymanın aradan qaldırılması, təhsil və ədliyyə sahəsində əməkdaşlıq müqavilələri imzalanıb, sadəcə olaraq bu layihələrin həyata keçməsini gözləyirik.
- Azərbaycan regionun aparıcı dövlətlərindən biridir. Azərbaycanın regionda apardığı siyasəti necə dəyərləndirirsiniz?
- Ümumiyyətlə, Azərbaycanla Mərakeş arasında oxşarlıqlar var. Azərbaycan region dövlətləri ilə balanslaşdırılmış və qarşılıqlı dialoqa əsaslanan uğurlu siyasət yürüdür. Biz də bu siyasəti dəstəkləyirik, çünki Mərakeş Krallığı da regionda və qonşu dövlətlərə qarşı oxşar siyasət yürütməkdədir. Hesab edirəm ki, Azərbaycanın apardığı siyasət yüksək qiymətləndirilməlidir. Çünki dialoq və balanslaşdırılmış siyasət ölkədə və dünyada stabilliyin və sülhün zəmanətidir. Əslində, aparılan siyasət Azərbaycan diplomatiyası üçün yenilik deyil. Bu sahədə Vaşinqton, Nyu York, hətta Bakıda tanış olduğum azərbaycanlı diplomatların Azərbaycanın milli maraqlarını müdafiəsi, xüsusən də Dağlıq Qarabağ həqiqətlərinin beynəlxalq aləmdə tanınması üçün etdikləri səylər əvəzsizdir. Bu xüsusiyyətlərin diplomatlarda olması çox yaxşıdır.
Biz də Azərbaycan diplomatiyasını bu məsələdə tam dəstəkləyirik və haqq-ədalətin bizim tərəfimizdə olduğuna əminik.
Dolayısı ilə demək istəyirəm ki, Azərbaycanın regionda rolu və əhəmiyyəti əvəzsizdir. Azərbaycanda stabilliyin olması rəsmi Bakı ilə əlaqələrə əhəmiyyət verən Mərakeş Krallığı üçün də çox vacibdir.
- Mərakeş Ümumdünya Ticarət Təşkilatının üzvüdür və Azərbaycan da bu təşkilata üzv olmaq istəyindədir. Mərakeş Azərbaycana bu təşkilata üzv olmaqda hansı köməkliyi göstərə bilər?
- Bildiyiniz kimi, Ümumdünya Ticarət Təşkilatı Mərakeşdə təsis olunub. Təbii ki, Mərakeş Krallığı da ÜTT-də qazandığı təcrübəsini Azərbaycanla paylaşa bilər.
Mərakeş Krallığı bundan əvvəl aparılan bütün proseslərdə aktiv və aparıcı rol oynayıb. Mərakeşi ÜTT-nin qərargahı da hesab etmək olar. Ona görə də tam əminliklə deyə bilərəm ki, əgər Azərbaycan tərəfindən belə bir tələb və istək olsa, Mərakeş Krallığı tərəddüd etmədən öz təcrübəsi ilə paylaşmağa hazırdır. Bildiyiniz kimi, ÜTT-yə üzv olmaq istəyən ölkələr müəyyən mərhələlərdən keçməli və öhdəliklər yerinə yetirməlidirlər. Hazırda Azərbaycanın ÜTT-yə üzvlük məsələsində hansı mərhələdə olduğunu tam olaraq bilmirəm. Lakin hesab edirəm ki, quruma üzvlük üçün ciddi addımlar atılır və Azərbaycan üzv olduqdan sonra adıçəkilən təşkilatda mühüm rol oynayacaq.
