Azərbaycan, Bakı, 08 fevral / Trend , müxbir R.Hafizoğlu/
Türkiyənin Baş naziri Rəcəb Tayyib Ərdoğanın Avrasiya məsələləri üzrə müşaviri Qeybulla Ramazanoğlu hesab edir ki, Türkiyə XİN rəhbəri Ahmet Davudoğlunun Avrasiya iqtisadi birliyi yaratmaq təşəbbüsü Avropa İttifaqına alternativ deyil.
"Avrasiya iqtisadi birliyi Avropa İttifaqına alternativ deyil", - Ramazanoğlu bazar ertəsi Ankaradan telefonla Trend -a bildirib.
Trend -un arayışı: Türkiyənin XİN rəhbəri Ahmet Davudoğlu keçirdiyi mətbuat konfransında Avropa İttifaqı kimi Avrasiya iqtisadi birliyinin yaradılması təklifi ilə çıxış edib. Davudoğlu onu da qeyd edib ki , Asiya ölkələrinin belə bir birliyin yaradılmasına ehtiyacı var.
Ramazanoğlu hesab edir ki, Avrasiya birliyi əslində bir o qədər də yeni məsələ deyil və bu layihə Sovet İttifaqı dağıldıqdan sonra ortaya atılan bir layihədir.
"Avrasiya birliyindən əvvəl türk ölkələri birliyi gündəmə gətirilmişdi, lakin türk ölkələri birliyini reallaşdırmaq üçün yetərincə siyasi iradə nümayiş etdirilmədi", - Baş nazirinin müşaviri qeyd edib.
Ramazanoğlunun sözlərinə görə, Avrasiya birliyinin yaradılması, əslində, çox yaxşı olardı və bu qurumun yaradılması birbaşa Ankaranın xarici siyasətinə bağlıdır.
Baş nazirin müşaviri onu da qeyd edib ki, böyük ehtimal ki, bəzi ərəb ölkələri bu birliyə qatılmasın.
"Türkiyə yürütdüyü tarixi siyasət nəticəsində bəzi ərəb dövlətlərinin rəğbətini qazanmasına baxmayaraq, bir çox ərəb dövlətləri hələ də Ankaranın regiondakı artan siyasi nüfuzuna qısqanclıqla yanaşırlar", - o qeyd edib.
Ramazanoğlu onu da əlavə edib ki, bir sıra ərəb dövlətləri Ankaranın yürütdüyü xarici siyasətdən narahatdırlar.
"Lakin ərəb dövlətlərinin hamısının yekcins olduğunu da düşünmək doğru deyil. Bir sıra ərəb dövlətləri Ankara vasitəsilə onlar haqda ABŞ-da və Avropada formalaşmış terrorçu və terroru dəstəkləyən imicinin düzəlməsinə çalışırlar", - o əlavə edib.