Azərbaycan Prezidenti İlham Əliyev çərşənbə axşamı tikinti kompleksində səhmləri dövlət mülkiyyətində olan səhmdar cəmiyyətlərinin özəlləşdirilməsi haqqında sərəncam imzalayıb. Məlumatı AzərTAc Dövlət İnformasiya Agentliyi yayıb.
Sərəncamda deyilir ki, "Azərsutikinti" və "Azərsənayetikinti" açıq səhmdar cəmiyyətlərinin tərkibinə daxil olan müəssisə və obyektlər özəlləşdirilməyə açıq elan edilsinlər. "Azərenerjitikintiquraşdırma" və "Azərnəqliyyatyoltikinti" açıq səhmdar cəmiyyətlərinin səhmlərinin dövlət mülkiyyətində olan nəzarət səhm zərfləri (51%), "Azərkəndtikinti" ASC-nin səhmlərinin dövlət mülkiyyətində olan məhdudlaşdırıcı hissəsi (25,5%) özəlləşdirilməyə açıq elan edilsin.
Əmlak Məsələləri Dövlət Komitəsinə bu sərəncamla özəlləşdirilməyə açıq elan edilən müəssisə və obyektlərin, habelə səhmdar cəmiyyətlərin dövlət mülkiyyətində olan səhmlərinin qanunvericiliyə uyğun olaraq özəlləşdirilməsini təşkil etmək tapşırılıb.
Nazirlər Kabineti sərəncamdan irəli gələn məsələlərin həlli tapşırılıb.