Azərbaycan, Bakı, 12 aprel /Trend, müxbir M.Əliyev/
Azərbaycan və Qambiya arasında əməkdaşlığa dair protokol imzalanıb.
"Azərbaycan Respublikasının Xarici İşlər Nazirliyi və Qambiya Respublikasının Xarici İşlər, Beynəlxalq Əməkdaşlıq və Xaricdəki Qambiyalılarla iş üzrə Nazirliyi arasında əməkdaşlıq haqqında Protokol" imzalanıb. Bu barədə bazar ertəsi XİN-in mətbuat xidməti məlumat yayıb.
Xarici işlər naziri Elmar Məmmədyarov bazar ertəsi Qambiya Respublikasının xarici İşlər, beynəlxalq əməkdaşlıq və xaricdəki qambiyalılarla iş üzrə naziri Usman Cammehi qəbul edib.
Cammeh Qambiya-Azərbaycan münasibətlərinin cari vəziyyətini yüksək qiymətləndirib və ikitərəfli münasibətlərin inkişaf etdirilməsinin zəruriliyini qeyd edib.
Məmmədyarov ölkələrimiz arasında iqtisadi, mədəni, humanitar, təhsil, turizm və digər sahələrdə əməkdaşlığın inkişaf etdirilməsi üçün geniş potensialın olduğunu və bunun səmərəli istifadə olunmasının ölkələrarası münasibətlərin dərinləşməsinə daha da təkan verəcəyini vurğulayıb.
Həmçinin nazir Məmmədyarov Qambiya Respublikasının Ermənistan-Azərbaycan, Dağlıq Qarabağ münaqişəsi ilə bağlı beynəlxalq təşkilatlar, xüsusilə də Birləşmiş Millətlər Təşkilatı və İslam Konfransı Təşkilatı çərçivəsində keçirilmiş səsvermələrdə Azərbaycanın ədalətli mövqeyini dəstəklədiyinə görə qambiyalı həmkarına öz dərin təşəkkürünü bildirib.
Cavab olaraq qambiyalı diplomat ölkəsinin Ermənistan-Azərbaycan, Dağlıq Qarabağ münaqişəsi məsələsində Azərbaycanın tutduğu mövqeyi bundan sonra da dəstəkləyəcəyini söyləyib.