...

Azərbaycanın müxalifət partiyası deputatlığa ziyalı namizədləri də dəstəkləyəcək

Siyasət Materials 3 May 2010 17:42 (UTC +04:00)
Azərbaycanın müxalifət partiyası Ali Məclisinin sədri deyib ki, indiyədək deputatlığa 70 nəfərin namizədliyi müəyyənləşdirilib.

Trend-i buradan izləyin

Azərbaycan, Bakı, 3 may /Trend, müxbir A.Hüseynbala/

Azərbaycanın müxalifət partiyası Ali Məclisinin sədri deyib ki, indiyədək deputatlığa 70 nəfərin namizədliyi müəyyənləşdirilib.

"Biz seçkilərdə təkcə partiyanın namizədləri ilə iştirak etmək fikrində deyilik. Ayrı-ayrı dairələrdə biz partiyamızın üzvü olmayan ziyalıları, siyasətçiləri müdafiə edə bilərik", - bazar ertəsi Trend-ə Bütöv Azərbaycan Xalq Cəbhəsi Partiyası (BAXCP) Ali Məclisinin sədri Mikayıl Rəhimov bildirib.

Trend-in arayışı: Azərbaycanda parlament seçkilərinin 2010-cu ilin payızında keçiriləcəyi gözlənilir. Bundan əvvəlki seçkilər 2005-ci ilin noyabr ayında keçirilib. Azərbaycanda parlament seçkiləri majoritar sistem üzrə 125 seçki dairəsində keçirilir.

Rəhimovun sözlərinə görə, artıq 70 partiya üzvünün namizədliyi ilə bağlı konkret qərar verilib. "Digər partiyalarla ortaq namizədlə çıxış etmək məsələsi də gündəlikdə var. Partiyamız ötən parlament seçkisində də fəal şəkildə iştirak etdiyindən artıq müəyyən təcrübəsi var və bu, namizədlərin müəyyənləşməsinə öz təsirini göstərir", - partiya funksioneri əlavə edib.

Onun fikrincə, görüntü xatirinə namizədlər irəli sürmək niyyətləri yoxdur. "Seçkilərdə ciddi nəticələr əldə etməyi düşünürük. Təbii ki, birinci istəyimiz seçkidə partiya kimi iştirak etmək və pulsuz efir vaxtı almaqdır. İkinci niyyətimiz daha çox şansı olan namizədlərə üstünlük verməkdir. Üçüncü arzumuz milli maraqlara cavab verən platforma ilə seçkiyə qatılmaqdır. Bunun hər biri bizim üçün hədəfdir. Hədəflərə çatmaq üçün də mərhələ-mərhələ qarşımıza çıxan problemləri bir-bir aradan qaldırmağa çalışacağıq", - Rəhimov vurğulayıb.

Qüdrət Həsənquliyevin rəhbərliyi ilə Azərbaycan Xalq Cəbhəsi Partiyasının (AXCP) bir qrup üzvü 2002-ci ildə partiyadan ayrılaraq özlərinin "birləşdirici" qurultayını keçiriblər və 2004-cü ilə qədər AXCP-nin "Birləşdirici" qanadı kimi tanınıblar. 2004-cü ildə qurumun adında dəyişiklik edilib və Bütöv Azərbaycan Xalq Cəbhəsi Partiyasının təsis qurultayı keçirilib. 2005-ci ildə dövlət qeydiyyatına alınan BAXCP özünü iqtidara qarşı konstruktiv müxalifətçi hesab edir. Həsənquliyev Milli Məclisin deputatıdır.

Xəbər lenti

Xəbər lenti