Azərbaycan, Bakı, 14 may /Trend, müxbir V.Javoronkova/
Qırğızıstanın müvəqqəti hökuməti əhaliyə yaxşılığa doğru dəyişikliklərin artıq yaxında olduğunu mümkün qədər tez göstərməlidir. Mərkəzi Asiya ölkələri üzrə amerikalı ekspert Bryus Panyer belə hesab edir.
"Fikrimcə, müvəqqəti hökumətin ölkədə müsbət dəyişikliklərin yaxın vaxtlarda baş verəcəyini əyani şəkildə göstərməsi həqiqətən vacibdir", - "Azadlıq" radiosunun eksperti Panyer elektron poçt vasitəsilə Trend-ə bildirib.
Qırğızıstanda vəziyyət yenidən pisləşib. Cümə axşamı Oş vilayətində aprelin əvvəllərində devrilmiş ölkə Prezidenti Kurmanbek Bakiyevin tərəfdarları tərəfindən vilayətin inzibati binası zəbt edilib. Səhər eks-prezidentin Müdafiə Komitəsində bəyan ediblər ki, Oş vilayətinin inzibati binası əvvəlki kimi yenə də Bakiyev tərəfdarlarının əlindədir.
Sonradan məlum olub ki, Oş vilayətinin inzibati binası Qırğızıstanın müvəqqəti hökuməti tərəfdarlarının nəzarəti altına keçib. "İnterfaks"ın hadisə yerində olan müxbirinin verdiyi məlumata görə, Bakiyev tərəfdarları binanı tərk etsələr də şəhərin əsaş meydanındadırlar.
Müvəqqəti hökumətin mindən artıq tərəfdarı cümə günü Oş Dram Teatrının binası qarşısında toplaşıblar. Gözlənilir ki, müvəqqəti hökumətin Oş vilayətinin kəndlərindən olan tərəfdarları da onlara qoşulacaqlar. Bu arada Cəlalabadda Bakiyevi dəstəkləyən mitinqlər keçirilir.
Bundan əlavə, ölkənin cənubundakı Cəlalabad vilayətinin inzibati binası yanında orada toplaşan müvəqqəti hökumət və Bakiyevin tərəfdarları arasında silahlı toqquşma baş verdiyi barədə məlumatlar var. Yaralıların olduğu bildirlir.
Ekspertin fikrincə, ölkədə vəziyyətin tam normallaşması üçün müvəqqəti hökumət yubanmadan islahatların həyata keçirilməsinə başlamalıdır.
"Müvəqqəti hökumət xalqa heç olmasa problemli sahələrin birində irəliləyişi göstərməlidir", - o bildirib.
Panyer hesab edir ki, Qırğızıstanda müvəqqəti hökumətə Bakiyevin idarəçiliyi dövründən çoxsaylı problemlər miras qalıb. Qırğızıstanda baş verənlər pis əlamətdir. Çünki önlar ölkənin cənubunda aprel hadisələri nəticəsində devrilmiş Bakiyevin tərəfdarlarının qaldığını sübut edir.
Panyerin sözlərinə görə, ölkədəki sosial-iqtisadi vəziyyət mürəkkəb olaraq qalır. Eləcə də qonşu dövlətlərlə sərhədlərin bağlı olması Qırğızıstanla ticarətə mane olur. "İndiki şəraitdə belə qonşular müvəqqəti hökumətin vəziyyətini çətinləşdirir", - o deyib.
Bundan başqa, elektrik enerjisinin çatışmazlığı Qırğızıstanda əsas problemlərdən biri olaraq qalmaqdadır.
Nə qədər ki, havalar istidir, aydındır ki, elektrik əhaliyə kifayət edir. Lakin qarşıdan qış gəlir və müvəqqəti hökumət ölkəni elektrik enerjisi ilə təmin etmək üçün zəruri addımlar atmalıdır. Ekspertin sözlərinə görə, Bakiyev hökuməti zamanı hər qış elektrik enerjisi norma ilə verilirdi, məktəblər elektrik enerjisinə qənaət etmək məqsədilə bir neçə həftə məcburi tətilə bağlanırdı.
Müvəqqəti hökumət ölkə konstitusiyasının hansı formada olması barədə söhbətlərə xeyli vaxt itirib. Ekspert belə hesab edir.
"Bunun əvəzində vəzifəli şəxslərdən bəziləri SES-ə baş çəkməli və ya bir neçə fermaya gedib fermerlərdən məhsulun necə olacağını soruşmalı və ya müvəqqəti hökumətin onlara necə kömək edə biləcəyi barədə maraqlanmalı idilər", - o deyib.
Panyerin fikrincə, indi müvəqqəti hökumət ölkənin gələcəyi üçün mühüm əhəmiyyət kəsb edəcək və yalnız əhalinin bir qisminin oxuduğu sənədlər üzərində işi təbliğ etmək deyil, gələcəyə yaxşı ümidlər üçün maddi əsas verə bilər.
"Bakiyevin yenidən hakimiyyətə qayıtmasının qeyri-mümkün olduğunu demək olmaz, lakin bu, az inandırıcıdır", - ekspert deyib.
Müxalifətdən başqa, Bakiyevin Qırğızıstandan çıxmasını təmin edən Rusiya, Birləşmiş Ştatlar və ATƏT var və ekspertin fikrincə, bu üç tərəfdən hansı birininsə onun hakimiyyətə qayıdışına kömək etməsi üçün səbəbi yoxdur.
"Eləcə də Rusiyanın Bakiyevin qayıtması əleyhinə olduğunu nəzərə alsaq, onun Qırğızıstana təkcə siyasi deyil, həm də fiziki qayıdışını təsəvvür etmək çətindir", - Panyer deyib. - "Rusiyanın hava məkanından istifadəyə icazə olmadığı halda Bakiyev evə qayıtmaq üçün çox uzun yol qət etməli olacaq".
