Stavropoldakı partlayışda xəsarət alan Azərbaycan vətəndaşının vəziyyəti sabitləşib

Azərbaycan, Bakı, 28 may /Trend, müxbir E.Tarıverdiyeva/

Stavropolda baş vermiş partlayış zamanı xəsarət alan onyeddiyaşlı Azərbaycan vətəndaşı Bəxtiyarov Ayxan Alay oğlunun vəziyyəti stabilləşib. Bu haqda Trend-ə Rusiya Federasiyası Fövqəladə Hallar Nazirliyinin Stavropol bölməsindən xəbər verilib.

FHN əməkdaşının məlumatına görə, Bəxtiyarovun vəziyyətinin partlayışdan sonra son dərəcə ağır kimi qiymətləndirilməsinə baxmayaraq stabilləşib.

"Bəxtiyarov 4 saylı şəhər xəstəxanasının reanimasiya şöbəsindədir. Bu gün onun ağ ciyərlərini süni ventilə aparatından ayırıblar", - FHN əməkdaşı deyib.

Trotil ekvivalenti ilə 400 qram gücündə olan əldədüzəlmə partlayıcı qurğu mayın 26-da axşam Stavropol şəhərinin mədəniyyət və idman sarayının yanındakı kafenin yaxınlığında işə salınıb. Bomba "Vaynax" çeçen rəqs ansamblının konsertinin başlanmasına 15 dəqiqə qalmış partladılıb. Hadisə yerində üç, bir qədər sonra isə xəstəxanada daha dörd nəfər dünyasını dəyişib. 40-dan çox adam yaralanıb.

Terrorçuluq aktı, iki və daha çox şəxsin ümumtəhlükəli üsulla qətlə yetirilməsi, partladıcı qurğuların qanunsuz hazırlanması maddələri üzrə cinayət işi qaldırılıb.

Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az

Trend-in ən mühüm və maraqlı xəbərlərini "Telegram"da izləyin