Türkiyə, İstanbul, 5 iyun /Trend, müxbir S.Süleymanov/
İlk dəfə olaraq Asiyada Qarşılıqlı Fəaliyyət və Etimad Tədbirləri üzrə Müşavirəyə (AQFETM) üzv olan ölkələrin dövlət və hökumət başçılarının sammiti Qazaxıstan sərhədlərindən kənarda keçiriləcək. Bu barədə Qazaxıstan XİN-in mətbuat katibi İlyas Ömərov bildirib. "Yüksək səviyyədə keçirilən görüş zamanı müşavirə tarixində ilk dəfə olaraq sədrlik Qazaxıstandan Türkiyəyə keçəcək. Türkiyənin müşavirəyə sədrliyi qəbul etməsi forumun beynəlxalq nüfuzunun möhkəmlənməsinə, eləcə də müşavirənin sədri kimi Türkiyənin və AQFETM prosesinin təşəbbüskarı kimi Qazaxıstanın xarici siyasətinin təsirinin artmasına yeni təkan verəcək", - Ömərov deyib.
Onun sözlərinə görə, Türkiyə tərəfi müşavirənin sədri kimi Asiyada kooperativ təhlükəsizliyin qurulmasını özünün prioriteti seçib.
"Sammitin gedişində AQFETM Katibliyinin imtiyazları və immunitetləri barədə, onun personalı və AQFETM dövlətlərinin nümayəndələri haqqında Konvensiyanın imzalanması, eləcə də sammitin yekun sənədi olan siyasi bəyannamənin qəbul edilməsi planlaşdırılır", - Qazaxıstan XİN-in mətbuat katibi bildirib.
Ömərovun sözlərinə görə, AQFETM-ın imtiyazları və immunitetləri haqqında Konvensiyanın imzalanması ilə forumun institusionallaşmasının əsas mərhələsi başa çatır. "Üçüncü sammitdə siyasi bəyannamənin qəbul edilməsi Asiyada sülhün və təhlükəsizliyin möhkəmlənməsi işində AQFETM prosesinə yeni təkan verəcək. Bununla yanaşı, AQFETM etimad tədbirlərinin həyata keçirilməsi çərçivəsində narkotiklərin qanunsuz dövriyyəsi ilə mübarizənin (əlaqələndirici İran) fəaliyyət planına baxılması, eləcə də AQFETM Katibliyinin bir sıra inzibati və maliyyə məsələləri, katibliyin yeni rəhbərliyinin və 2010-cu il büdcəsinin təsdiqlənməsi planlaşdırılır", - Ömərov deyib.
Onun sözlərinə görə, sammitdə Vyetnam və İraqın müşavirənin tamhüquqlu, həmçinin Banqladeşin müşahidəçi qismində üzvlüyə qəbulu gözlənilir.
"İyunun 7-də İstanbulda sammit ərəfəsində Qazaxıstanın ATƏT-ə sədrliyinin himayəsi altında ATƏT-in asiyalı tərəfdaşlar qrupu (Avstraliya, Əfqanıstan, Monqolustan, Koreya Respublikası, Tailand, Yaponiya) üçün "XXI əsrdə Avrasiyada təhlükəsizlik və iqtisadi əməkdaşlıq" adlı xüsusi tədbirin təşkil olunması planlaşdırılır. Bu tədbir iki struktur arasında ümumi təhlükəsizlik və etimad maraqlarında qarşılıqlı sərfəli əlaqələrin inkişafı və möhkəmləndirilməsinə yönəldilib", - Ömərov bildirib.
