Azərbaycan, Bakı, 18 iyun /Trend, müxbir T.Hacıyev/
Azərbaycan Xalq Cəbhəsi və Klassik Xalq Cəbhəsi partiyalarının birləşməsi Əli Kərimlinin yürütdüyü siyasətə görə mümkünsüzdür. Bu barədə cümə günü Trend-ə Klassik Xalq Cəbhəsi Partiyasının (KXCP) sədri Mirmahmud Mirəlioğlu bildirib.
"Əli Kərimlinin yürütdüyü siyasət partiyaların birləşməsini mümkünsüz edir. Ona görə ki, biz əvvəllər də kütləvi aksiyaların birgə keçirilməsi ilə bağlı onunla birlikdə razılaşma əldə etmişdik. Bir müddət üstündən keçəndən sonra həmin fikri özününküləşdirir. Sonra da onun həyata keçirilməsinə mane olur. Elçibəyə münasibət, bizim keçdiyimiz yol, tərcümeyi-halımız birləşməyimizə mane olur", - Mirəlioğlu deyib.
Azərbaycan Xalq Cəbhəsi Azərbaycan Milli Azadlıq Hərəkatı zamanı gizli şəkildə 1989-cu ildə təsis olunub. Partiya kimi 1995-ci ildə qeydiyyatdan keçib. 2000-ci ilin avqust ayında partiya sədri Əbülfəz Elçibəyin vəfatından sonra ideoloji səbəblərdən partiya iki hissəyə - Azərbaycan Xalq Cəbhəsi Partiyası (AXCP) və Klassik Xalq Cəbhəsi Partiyası (KXCP) qollarına bölünüb. Hazırda AXCP sədri Əli Kərimlidir.