Azərbaycan XİN rəhbəri Latviya, İsveç və Norveç səfirlərini fəaliyyət müddətlərinin başa çatması ilə əlaqədar qəbul edib

Azərbaycan, Bakı, 14 iyul /Trend, müxbir S.Ağayeva/

Azərbaycanın xarici işlər naziri Elmar Məmmədyarov iqamətgahı Stokholmda yerləşən İsveç Krallığının səyyar səfiri Hans Qunnar Adeni, Latviyanın səfiri Mixails Popkovsu, Norveç Krallığının səfiri Jon Ramberqi ölkəmizdə fəaliyyət müddətlərinin başa çatması ilə əlaqədar qəbul edib. Məlumatı XİN-in mətbuat xidməti yayıb.

Görüş zamanı səfir Hans Qunnar Aden ölkələrimiz arasındakı iqtisadiyyat, təhsil, mədəniyyət, humanitar və digər sahələrdə münasibətlərin daha da genişlənməsi üçün fəaliyyət göstərdiyini söyləyib. O, öz fəaliyyəti müddəti ərzində XİN ilə faydalı əməkdaşlığını yüksək qitmətləndirib və Azərbaycandan xoş xatirələrlə ayrıldığını vurğulayıb.

Mixails Popkovs Azərbaycanda Latviyanın səfiri olduğu dövrdə ölkələr arasındakı bütün sahələrdə ikitərəfli münasibətlərin daha da genişlənməsi və inkişafı üçün fəaliyyət göstərdiyini qeyd edib. Azərbaycandan xoş xatirələrlə ayrıldığını vurğulayan Mixails Popkovs fəaliyyəti zamanı göstərilən dəstək və diqqətə görə minnətdarlığını bildirib.

İşlədiyi dövrdə ölkələr arasındakı münasibətlərin daha da genişlənməsi və inkişafı üçün fəaliyyət göstərdiyini söyləyən Jon Ramberq bu istiqamətdə Azərbaycan Xarici İşlər Nazirliyi ilə faydalı əməkdaşlığını qeyd edib.

Məmmədyarov səfirlərə xoş arzularını bildirib və onlara gələcək işlərində uğurlar arzulayıb.