Azərbaycan, Bakı, 18 avqust /Trend, müxbir T.Hacıyev/
Azərbaycanın müxalif Ümid Partiyasının parlament seçkilərində irəli sürüləcək namizədlərinin siyahısı müəyyənləşib. Bu barədə çərşənbə günü Trend-ə Ümid Partiyasının sədr müavini Ənvər Ağayev bildirib.
"Hal-hazırda 73 dairə üzrə namizədlər müəyyənləşib. Lakin bir neçə dairədən də namizəd irəli sürülməsi gözlənilir. Hər bir halda son qərarı siyasi şuranın iclası qəbul edəcək." - Ağayev əlavə edib.
Azərbaycanda Parlament seçkilərinin 2010-cu ilin noyabr ayının 7-də keçiriləcəyi gözlənilir. Bundan əvvəlki seçkilər 2005-ci ilin noyabr ayında keçirilib. Azərbaycanda Parlament seçkiləri majoritar sistem üzrə 125 seçki dairəsində keçirilir.
Ağayev partiyanın seçki kanpaniyası haqqında da danışıb.
"Hal-hazırda partiyanın seçki kampaniyasının təşkili ilə bağlı partiya tərəfindən vahid proqram hazırlanır. Müxtəlif telekanallarda pullu və pulsuz efir vaxtından istifadə edərək seçki kapaniyasını təşkil etməyi planlaşdırırıq." - Ağayev deyib
Ümid Partiyası 1993-cü ildə təsis edilib. Partiyanın ilk sədri Əbülfət Əliyev olub. 2002-ci ildə partiya Vətəndaş Birliyi Partiyası (VBP) ilə birləşib. 2002-ci il dekabrın 15-də Ümid Partiyasının III Qurultayında partiyanın sədri İqbal Ağazadə seçilib.