Azərbaycan, Bakı, 27 avqust /Trend, müxbir S.Süleymanov/
ATƏT və NATO ilə əməkdaşlıq, o cümlədən, regional təhlükəsizlik məsələləri, həmçinin, Əfqanıstan və Qırğızıstandakı vəziyyət Qazaxıstanın dövlət katibi, xarici işlər naziri Kanat Saudabayevlə NATO Baş katibinin Mərkəzi Asiya və Qafqaz ölkələri üzrə xüsusi nümayəndəsi Robert Simmons arasında keçirilən görüşdə müzakirə olunub. Bu barədə Trend-ə Qazaxıstan XİN-in mətbuat katibi İlyas Ömərov məlumat verib.
"Bundan başqa, "ATƏT-NATO" formatında qarşılıqlı fəaliyyətə toxunan həmsöhbətlər dekabrın 1-2-də Astanada keçiriləcək ATƏT sammitinin gündəliyindəki məsələləri nəzərdən keçiriblər. Buraya təşkilatın Şimali Atlantika Alyansı ilə əfqan məsələsi üzrə əməkdaşlıq daxildir ki, bu, Qazaxıstan Nümayəndəliyinin hərbi-siyasi ölçülmələrində əsas prioritetlərdən biridir", - Ömərov deyib.
Robert Simmonsla görüş zamanı Qazaxıstan Prezidenti Nursultan Nazarbayevin Belçikaya qarşıdakı səfəri də müzakirə olunub.
"NATO nümayəndəsinin sözlərinə görə, dövlət başçımızın səfəri, təqribən, bu il oktyabrın sonlarında baş tutmalıdır", - Ömərov deyib.
...
