Azərbaycan, Bakı, 18 oktyabr /Trend, müxbir K.Zərbalıyeva/
Azərbaycan Seçki Məcəlləsinə uyğun olaraq parlament seçkiləri ilə əlaqədar Müdafiə Nazirliyinin hərbi hissələrində təşkil olunacaq səsvermə məntəqələrində müşahidəçilərin iştirak etməsinə şərait yaradılacaq. Bu barədə bazar ertəsi Trend-in sorğusuna cavab olaraq Müdafiə Nazirliyinin mətbuat xidmətinin rəhbəri Eldar Sabiroğlu məlumat verib.
Azərbaycanda parlament seçkiləri noyabrın 7-də keçiriləcək. Sentyabrın 3-də seçkilərə rəsmi start verilib.
Bundan əvvəlki seçkilər 2005-ci ilin noyabr ayında keçirilib. Azərbaycanda parlament seçkiləri majoritar sistem üzrə 125 seçki dairəsində aparılır.
Azərbaycandakı parlament seçkisini ATƏT, Avropa Şurası və MDB-dən olan xarici müşahidəçilər və yerli müşahidəçilər izləyəcəklər.
Sabiroğlu bildirib ki, Mərkəzi Seçki Komissiyası xüsusi rejimdə xidmət edən hərbçilərin harada səs verəcəkləri barədə seçkiyə beş gün qalmış qərar qəbul edəcək.