...

Almaniya İranda həbs olunan iki almanın azad olunması üçün cəhdlərini dayandırmayacaq

Siyasət Materials 23 Noyabr 2010 16:27 (UTC +04:00)
Almaniya İranda həbs olunan iki vətəndaşının azad olunması ilə bağlı əlindən gələni əsirgəməyəcək. Bu barədə Almaniya XİN-in mətbuat ofisindən bildirilib.
Almaniya İranda həbs olunan iki almanın azad olunması üçün cəhdlərini dayandırmayacaq

Azərbaycan, Bakı, 23 noyabr/Trend, müxbir T.Konyayeva/

Almaniya İranda həbs olunan iki vətəndaşının azad olunması ilə bağlı əlindən gələni əsirgəməyəcək. Bu barədə Almaniya XİN-in mətbuat ofisindən bildirilib.

"Biz vətəndaşlarımızın azad olunması ilə bağlı var gücümüzü sərf edirik, - Berlindən Almaniya XİN-in rəsmi nümayəndəsi Trend-ə bildirib. - Biz vəziyyətin çox mürəkkəb olmasına baxmayaraq, cəhdlərimizi dayandırmayacağıq".

Oktyabrın 10-da İranın şimal-qərb hissəsində ölkəyə turist vizası ilə gələn iki Almaniya vətəndaşı jurnalist səlahiyyətləri əldə etmədən Səkinə Aştianinin qohumlarından müsahibə götürməyə cəhd göstərdiklərinə görə həbs olunublar. İran onlara qarşı casusuq ittihamı irəli sürüb.

Bazar ertəsi İranın baş prokuroru Qulamhüseyn Möhsüni Ejeyi deyib ki, İranda saxlanılan iki Almaniya vətəndaşının işinə məhkəmədə baxılacaq. Bu barədə "Tehran Times" qəzeti yazır.

Mətbuat katibinin sözlərinə görə, indiyədək AFR səfirliyinin əməkdaşları həbs olunmuş vətəndaşlarla iki dəfə görüşüblər.

"Hazırda biz müntəzəm olaraq konsulluqdan onlara baş çəkmək üçün icazə almağa nail oluruq", - o deyib.

İran məhkəməsi iki uşaq anası, 43 yaşlı Səkinə Məhəmmədi Aştianini ilk dəfə 2006-cı ildə ailə sədaqətini pozmaqda ittiham edib və ona 99 çubuq cəzası verilib. Hökmün yerinə yetirilməsinə baxmayaraq, 2007-ci ildə məhkəmə yenidən cinayət işi qaldıraraq Aştiani daşqalaq yolu ilə ölüm cəzasına məhkum edib.

Bu ilin sentyabrında Aştiani cinayət törətdiyinə görə dar ağacından asılmaqla ölüm cəzasına məhkum edilib və İranın baş prokuroru Qulamhüseyn Möhsüni Ejeyinin sözlərinə görə, bu hökm sədaqətsizliyə görə çıxarılan hökmdən daha üstündür.

Xəbər lenti

Xəbər lenti