Azərbaycan, Bakı, 26 noyabr /Trend, müxbir T.Hacıyev/
Azərbaycanın müxalif Vətəndaş və İnkişaf Partiyasının (VİP) sədri hesab edir ki, müxalifətdə təklif olunan yeni birlik modeli heç bir effekt verməyəcək.
"Müxalifət partiyaları birləşməsə, təşkilatlanmasa və narazı elektoratı ətrafında birləşdirə bilməsə, ölkədəki siyasi proseslər olduğu kimi davam edəcək və heç nə dəyişməyəcək. Təşkilatlanmanın yeni modelini təklif etməkdənsə, əvvəlki birliklərin niyə dağılması və niyə nəticəsiz olması haqqında müzakirələr aparaq lazımdır. Hakimiyyət köhnə, müxalifət eyni, beynəlxalq təşkilatlar da əvvəlki ovqatında. İndi yaranacaq modellərin hər biri bundan əvvəlkilərin, siyasi birliklərin aqibətini yaşayacaq", - cümə günü Trend-ə VİP sədri Əli Əliyev bildirib.
Azərbaycanda parlament seçkiləri noyabrın 7-də keçirilib.
Səsvermədə seçicilərin 50,14 faizi (2480205 seçici) iştirak edib. Seçkilərdə 690 namizəd mandat almaq uğrunda mübarizə aparıb. Seçkilərin nəticələrinə əsasən, yuxarıda adları sadalanan partiyalardan heç biri parlamentdə yer qazana bilməyib.
Azərbaycanda parlament seçkiləri majoritar sistem üzrə 125 seçki dairəsində aparılır. Bundan əvvəlki seçkilər 2005-ci ilin noyabr ayında keçirilib.
Əliyev bildirib ki, parlament seçkilərində uduzduqdan sonra görüntü xatirinə yeni birliklər axtarışına çıxmaq lazım olduğu barədə bəzi bəyanatlar səsləndirilir.
"İndi Xalq parlamenti adlı yeni versiya ortaya atılıb, ancaq mən bunların heç birinin nəticə verəcəyinə inanmıram. Əgər indiyə qədər eyni adamların yaratdığı təşkilatlar eyni situasiyada nəticəsiz olubsa, yəqin ki, indi yaranacaq yeni birliyin də aqibətini həmin şeylər gözləyir. Çünki hakimiyyət bu birlikləri yaradan və cəmiyyətə təklif edən təşkilatların əhval-ruhiyyəsindən və siyasi istəklərindən xəbərdardır", - Əliyev əlavə edib.
Onun sözlərinə görə, bu vaxta qədərki birliklər bir çox hallarda subyektiv amillər səbəbindən pozulub.
"Həmin subyektiv amillər və həmin insanlar hələ də qalır. Hesab edirəm ki, heç nə dəyişməyəcək. Ancaq yeni təşkilatlanma o halda ola bilər ki, tərəflər bu vaxta qədər öz fəaliyyətlərində olan birliklərin nəyə görə dağılmasına səmimi cavab axtarsınlar. Bunun alternativi yoxdur. Ancaq o vaxt verilə biləcək təkliflər nəticəli ola bilər və cəmiyyət ondan fayda görə bilər. Əks halda bütün təşəbbüslərin nəticəsi sıfıra bərabər olacaq", - o, vurğulayıb.
Noyabrın 23-də Müsavat partiyasının mərkəzi qərargahında 7 noyabr parlament seçkilərinin nəticələrini tanımayan namizədlərin forumu keçirilib.
AXCP-Müsavat seçki blokunun təşəbbüsü ilə keçirilən forumda Milli İstiqlal, Klassik Xalq Cəbhəsi, Azadlıq, Demokratik Azərbaycan Dünyası, Azərbaycan Xalq partiyalarının təmsilçiləri və müstəqil namizədlər iştirak ediblər. Forumda parlament seçkiləri, seçkidən sonrakı vəziyyət müzakirə edilib.
Forumda Milli Məclisə alternativ qurumun - Xalq parlamentinin yaradılması təklifi də səsləndirilib.
