Azərbaycan, Bakı, 12 dekabr /Trend, müxbir M.Əliyev/
Bakıda yanvarın sonu fevralın əvvəllərində Xəzəryanı ölkələrin işçi qrupunun görüşü olacaq, bunu bazar günü Trend-ə xarici işlər nazirinin müavini Xələf Xələfov bildirib.
"İşçi qrupları tərəfindən iki məsələ üzərində - nərə balıqlarının ovlanmasına qadağanın qoyulmasının mexanizminin işlənib hazırlanması, milli və suveren zonaların 24-25 mil həddində razılaşdırılması istiqamətində danışıqlar aparılır. İşçi qruplarının Bakı görüşündə də bu məsələ müzakirə ediləcək" Xələfov deyib.
Nazir müavini həmçinin bildirib ki, Xəzəryanı ölkələrin dövlət başçılarının növbəti sammiti Rusiyada keçiriləcək.
"Rusiya bununla bağlı tarixi müəyyənləşdirəcək və Xəzəryanı ölkələri ilə razılaşdıracaq" Xələfov bildirib.
Noyabrın 18-də Bakıda Xəzəryanı ölkələrin dövlət başçılarının sammiti keçirilib.
Xəzəryanı dövlətlər (Rusiya, Azərbaycan, Türkmənistan, Qazaxıstan və İran) 2003-cü ilin noyabrında Xəzərdə dəniz mühitinin qorunması üzrə Çərçivə Konvensiyasını imzalayıblar.
1998-ci ilin iyulunda Qazaxıstan ilə Rusiya arasında yeraltı sərvətlər üzrə suveren hüquqların həyata keçirilməsi məqsədi ilə Xəzərin şimal hissəsində dəniz dibinin bölünməsi haqqında saziş imzalanıb, 2002-ci ilin mayında isə həmin sazişə müvafiq protokol imzalanıb.
2001-ci il noyabrın 29-da və 2003-cü il fevralın 27-də Qazaxıstanla Azərbaycan arasında Xəzər dənizinin dibinin bölünməsi haqqında saziş və ona müvafiq protokol imzalanıb.
Həmçinin, 2003-cü il mayın 14-də Qazaxıstan, Azərbaycan və Rusiya arasında Xəzər dənizinin həmsərhəd hissələrinin bölünməsi xəttinin qovuşma nöqtəsinə dair saziş imzalanıb.
