Azərbaycan, Bakı, 11 yanvar /Trend, müxbir E.Tariverdiyeva/
GUAM Xarici İşlər Nazirləri Şurasının iclası ən yaxın vaxtlarda keçiriləcək, buna qədər isə ənənəvi olaraq GUAM ölkələri Milli Əlaqələndiricilər Şurası çağırılacaq, çünki gündəliyi, sənədlərin layihələrini və s. onlar hazırlayırlar. Bu barədə Trend-ə təşkilatın baş katibi Valeri Çeçelaşvili bildirib.
Çeçelaşvili deyib ki, GUAM XİNŞ iclasının keçiriləcəyi tarix Moldova hökumətinin nə qədər tez formalaşacağından asılıdır.
Yanvarın 14-də Moldovanın təyin edilmiş Baş naziri Nazirlər Kabinetinin tərkibini Moldova parlamentinə təqdim etməlidir.
"Moldova XİN rəhbəri təyin edilən kimi, mən iclasın tarixinin razılaşdırılması üçün onunla əlaqə yaradacağam. Bu çox vacibdir, çünki məhz Moldova təşkilata sədrliyi qəbul edir və gələn il üzrə XİNŞ iclasları üzrə öz proqramını təqdim etməlidir", - o deyib.
Çeçelaşvilinin sözlərinə görə, GUAM ölkələri xarici işlər nazirlərinin görüşündə Ukraynanın təşkilata sədrliyinə yekun vurulacaq.
"Nazirlər ötən ilə yekun vuracaqlar və əməkdaşlığın perspektivləri üzrə öz baxışlarını təqdim edəcəklər ki, bu da öz növbəsində Moldova tərəfinin sədrliyinin birgə təsdiqlənmiş proqramında ifadə olunacaq. Bu proqramı sədr təqdim edir, lakin onu GUAM-a üzv olan bütün ölkələrin XİN rəhbərləri təsdiqləməlidir", - Çeçelaşvili deyib.
Baş katibin sözlərinə görə, əvvəllər təsdiqlənmiş qrafikə uyğun olaraq işçi qruplarında işlər də davam etdirilir.
Yanvarın son ongünlüyündə GUAM ölkələrinin birgə turizm məhsulunun işlənməsi ilə məşğul olan turizm ekspertlərinin növbəti görüşü keçiriləcək.
"Bu çox vacib görüş olacaq, çünki onun nəticəsi Tokiodakı ikihəftəlik seminardan əvvəl səylərin yekun əlaqələndirilməsi olacaq", - o deyib.
Çeçelaşvilinin sözlərinə görə, bu ay GUAM ölkələrinin hüquq-mühafizə orqanları nümayəndələri üçün mütəşəkkil cinayətkarlığa qarşı virtual mübarizə mərkəzi çərçivəsində quraşdırılan kriptoqrafik mühafizə sisteminin mənimsənilməsi üzrə təlimlər də keçiriləcək.
Bundan əlavə, Çeçelaşvilinin sözlərinə görə, fevralda iqtisadiyyat və ticarət üzrə işçi qrupunun iclasları keçiriləcək.
"Hazırda qrupun əlaqələndiricisi olan Gürcüstan tərəfi son təklif üzərində çalışır", - o deyib.
GUAM-ın formatı 1997-ci ildə Strasburqda Avropa İttifaqı ölkələri rəhbərlərinin sammiti zamanı yaradılıb. 1999-cu ildə bu formata Özbəkistan da qoşulub, dörd ildən sonra isə çıxıb. 2006-cı ildə Kiyevdə bu formatın birinci sammitində GUAM-ın beynəlxalq təşkilat elan olunması və Demokratiya və İqtisadi İnkişaf Uğrunda Təşkilat - GUAM adlandırılması haqqında qərar qəbul olunub.
