Qazaxıstan, Astana, 13 yanvar /Trend, müxbir K.Konırova/
Qazaxıstan və Azərbaycan arasında yüksək səviyyəli münasibətlər 2011-ci ildə mühüm beynəlxalq tədbirlərlə bağlı intensivləşdiriləcək. Bu barədə Trend-ə müsahibəsində Azərbaycanınn Qazaxıstandakı fövqəladə və səlahiyyətli səfiri Zakir Həşimov 2011-ci il üçün planları bölüşərək bildirib.
"Bu il Azərbaycan Prezidenti İlham Əliyevin Qazaxıstana rəsmi səfəri gözlənilir. Bundan əlavə, dövlət başçımız bu ilin payızında Qazaxıstanda keçiriləcək türkdilli dövlətlərin sammitində iştirak edəcək", - Həşimov deyib.
O, hər iki prezidentin qrafikinin uyğunlaşdırılması prosesinin getdiyini deyərək, Azərbaycan Prezidentinin Astanaya rəsmi səfər tarixini dəqiqləşdirməyib.
"Prezidentlərin görüşü ölkələrimiz arasında əməkdaşlığın gələcək inkişafına yönəldilib", - diplomat qeyd edib.
Həşimov əlavə edib ki, Qazaxıstanın İKT-yə hazırkı sədrliyi çərçivəsində Qazaxıstan və Azərbaycan arasında mövcud istiqamətdə daha sıx əməkdaşlıq nəzərdə tutulur.
"Bu il Qazaxıstanda Azərbaycanın fəal iştirak edəcəyi İslam iqtisadi forumunun keçirilməsi planlaşdırılır", - o deyib.
Həşimov xatırladıb ki, Azərbaycanda parlamentin yeni tərkibi öz işinə başlayıb.
"Bu il spiker Oqtay Əsədovun parlamentlərarası əlaqələrin yenilənməsi üçün Astanaya səfəri planlaşdırılır", - azərbaycanlı diplomat deyib.
Həşimov əlavə edib ki, hökumətlərarası komissiyada qəbul edilən qərara əsasən, cari ildə Azərbaycanda Qazaxıstan Mədəniyyət Günləri keçiriləcək.
