Azərbaycan, Bakı, 26 may /Trend, müxbir Т.Cəfərov/
İranda həbsdə olan üç ABŞ vətəndaşına qarşı irəli sürülmüş ittihamlar qanuni baxımdan əsassızdır. Onların cinayət işinə xitam verilməlidir. Bunu Trend-ə İranda həbsdə olan üç ABŞ vətəndaşının hüquqlarını müdafiə edən vəkil Məsud Şəfii (Massoud Shafii) bildirib.
2009-cu ilin iyulunda İran-İraq sərhədində Amerika vətəndaşları olan Şin Baver, Coşua Fetal və Sara Şord həbs ediliblər. Onlar İran sərhədini qanunsuz keçməkdə və casusluqda günahlandırılıblar. Lakin ABŞ bəyan edir ki, saxlanılanlar sərhədi təsadüfən keçən alpinistlər və səyyahlardır. Keçən il sentyabrın 14-də İran Ramazan bayramı münasibətilə Sara Şordu 500 min dollarlıq vəsiqə zəmanəti ilə azadlığa buraxıb, lakin digər iki məhbus hələ də həbsdə saxlanılır.
Şəfiinin fikrincə, həbs edilmiş ABŞ vətəndaşlarına qarşı irəli sürülən casusluq ittihamı ilə bağlı cinayət işində heç bir sübut yoxdur.
"Cinayət Məcəlləsinin 501-ci maddəsinin tələblərinə görə, şəxs məxfi məlumatlar əldə edərsə və həmin sənədləri digər ölkəyə ötürmüş olarsa, casus adlandırılır. Hüquqlarını qoruduğum şəxslərin heç birində bu hal olmayıb və onların casusluqda ittiham olunması əsassızdır, açılmış cinayət işində həmin maddənin tələblərinə dair sübutlar yoxdur", - Şəfii deyib.
Şəfii onların təqsirləndirildikləri sərhədi qanunsuz keçmə ittihamı ilə də cəzalandırılmasını əsassız sayır.
Onun sözlərinə görə, hər iki ABŞ vətəndaşı artıq 22 aydır həbsdədir və onların həbsdə olma müddətləri bu ittiham üzrə nəzərdə tutulan cəzaya hesablanmalıdır. Vəkil bu əsasla da həmin şəxslərin barəsindəki cinayət işinə xitam verilməsini zəruri sayır.
Şəfii həmin şəxslərin məhkəməsinin naməlum səbəblərdən bir neçə dəfə təxirə salındığını bildirib.
"Məhkumların məhkəmə prosesində iştirak etməməsi səbəbindən proses 2 dəfə təxirə salınıb", - vəkil deyib.
O, əlavə edib ki, İran Məhkəmə Sistemi ABŞ vətəndaşlarının məhkəməyə gətirilməməsi səbəblərinə aydınlıq gətirməyib.
İranda həbsdə olan iki ABŞ vətəndaşının sonuncu növbəti məhkəməsi may ayının 11-də (İran tarixi ilə Ordibeheşt ayının 21-də) keçirilməli idi, lakin təxirə salındı.
Şəfii Amerika vətəndaşları olan Şin Baver, Coşua Fetalın 17 gün aclıq aksiyası keçirdiyini və hazırda onların səhhətinin qənaətbəxş olduğunu deyib.
"Cari ilin əvvəlində (İranda il martın 21-də dəyişir) həbsdə olan ABŞ vətəndaşları öz ailələrindən göndərilən məktubların onlara verilməməsinə etiraz əlaməti olaraq 17 gün aclıq aksiyası keçirib. Hazırda onların vəziyyəti qənaətbəxşdir", - Şəfii Tehrandan telefonla Trend-ə deyib.
O, əlavə edib ki, dəfələrlə müraciət etməsinə baxmayaraq, hüquqlarını müdafiə etdiyi şəxslərlə görüşə imkan yaradılmır.
Vəkil onlarla sonuncu dəfə fevralın 6-da keçirilən məhkəmə prosesində görüşdüyünü bildirib.
