...

Türkiyə İsrail ilə bütün əlaqələri kəsməlidir - müxalifət

Siyasət Materials 9 Sentyabr 2011 16:44 (UTC +04:00)

Azərbaycan, Bakı, 9 sentyabr /Trend, müxbir A.Tağıyeva/

İsrail hakimiyyətinin Türkiyə vətəndaşları ilə kobud davranışından sonra Türkiyə bu ölkə ilə bütün diplomatik və ticarət əlaqələrini kəsməlidir. Türkiyənin müxalif Böyük Birlik Partiyasının (BBP) lideri Mustafa Destici deyib.

"İsrail Türkiyə ilə əlaqələrin kəsilməsindən həm iqtisadi, həm də siyasi cəhətdən böyük ziyan görəcək", - Destici cümə günü telefonla Trend-ə Ankaradan bildirib.

Sentyabrın 2-də Türkiyənin xarici işlər naziri Əhməd Davudoğlu bildirib ki, Türkiyə ilə İsrail arasında diplomatik münasibətlər ikinci dərəcəli səviyyəyə keçib. Bundan əlavə, Ankara Təl-Əvivlə hərbi əməkdaşlığı dayandırıb.

Nazir deyib ki, Ankara öz səfirini Təl-Əvivdən geri çağırıb. Davudoğlu onu da bildirib ki, İsrail Türkiyədən üzr istəməyincə, Təl-Əvivlə Ankara arasında münasibətlər bərpa olunmayacaq.

İsrailin Müdafiə Nazirliyinin İnformasiya-Analitika İdarəsinin rəhbəri Amos Gilad bəyan edib ki, İsrail-Türkiyə münasibətlərinin pisləşməsinə baxmayaraq, İsrailin hərbi attaşesi Türkiyəni tərk etməyəcək.

Ötən il ərzində iki ölkə arasındakı xarici ticarət dövriyyəsi 26 faiz artıb və 2011-ci ilin ilk yarısında onun ümumi həcmi 2,335 milyard dollar olub. İsrailə Türkiyə idxalının mühüm hissəsini 1,25 milyard dollar məbləğində sement, mərmər və digər tikinti materialları, geniş tələbat malları və qida məhsulları təşkil etdiyi halda, Türkiyəyə İsrail idxalı 1,1 milyard dollar olub. İsraildən gətirilən mallar arasında tanklar, dəzgahlar, mülki və hərbi aviasiya üçün müxtəlif avadanlıqlar, optik cihazlar və s. təşkil edir.

Partiya sədrinin sözlərinə görə, "Azadlıq donanması" ilə bağlı insident barədə BMT-nin hesabatı Ankaranı məyus edib və bu, bir daha sübut edib ki, Türkiyə bu məsələdə seçdiyi mövqeyi davam etdirməlidir və İsrail ilə əlaqələrin kəsilməsi yaranmış vəziyyətdən ən gözəl çıxış yoludur.

Destici həmçinin bildirib ki, bəzi müxalifət partiyaları İsrail ilə əlaqələrin pisləşməsini Türkiyə hökumətini yanlış xarici siyasət yürütməkdə ittiham edərək ona hücum etmək üçün fürsət hesab edirlər.

"İsrail bu məsələdə başlanğıcdan ABŞ və bəzi Qərb ölkələrinin dəstəyini alıb və Türkiyə hökumətinin uğursuzluğunun səbəbi xarici siyasətdə yox, əksinə Təl-Əvivin Qərblə əvvəlcədən əlbir olub planlaşdırdığı sui-qəsddədir.

Destici eyni zamanda təkid edir ki, İsrail hökuməti gizli şəkildə PKK-ya onun döyüşçülərini silahlandıraraq, ona logistika və informasiya dəstəyi verərək kömək edir. "Türkiyə hökuməti bundan xəbərdardır və bu, iki ölkə arasındakı əlaqələrin kəsilməsinin səbəblərindən biridir", - o deyib.

Hərbi və diplomatik sahədə son vaxtlaradək sıx əməkdaşlıq edən Türkiyə ilə İsrail arasındakı münasibətlərə ötən il mayın 31-də İsrail xüsusitəyinatlılarının Qəzza sektoruna humanitar yardım aparan gəmilərə hücum etməsindən sonra güclü zərbə dəyib. İsrail əsgərləri ilə toqquşmalar zamanı, Türkiyənin "Mavi Mərmərə" gəmisində doqquz türk fəalı həlak olub. Ankara Təl-Əvivlə münasibətlərə yenidən baxılacağını elan edib və İsraildən həlak olanların ailələrinə kompensasiyaların verilməsini tələb edib.

Onun fikrincə, əlaqələrin kəsilməsi Türkiyənin Yaxın Şərq ölkələrindəki nüfuzuna müsbət təsir göstərəcək.

Xəbər lenti

Xəbər lenti