Azərbaycan, Bakı, 19 sentyabr /Trend, müxbir K.Zərbalıyeva/
Azərbaycanda 2011-ci ildə 160 şəxs barəsində 95 cinayət işi Baş prokuror yanında Korrupsiyaya Qarşı Mübarizə İdarəsində (KQMİ) istintaq olunaraq məhkəmələrə göndərilib. Trend-in məlumatına görə, bunu bazar ertəsi jurnalistlərə İdarənin rəisi Kamran Əliyev bildirib.
Onun sözlərinə görə, 2010-cu ildə 104 iş məhkəmələrə göndərilmişdi.
"Hazırda KQMİ tərəfindən 89 cinayət işi üzrə istintaq gedir və bu işlər ilin sonunadək məhkəmələrə göndəriləcək", - Əliyev deyib.
O qeyd edib ki, İdarədə təhsillə bağlı bir neçə cinayət işinin istintaqı aparılır.
"Bunlarla bağlı mətbuata məlumat vermişik və bu işlər məhkəməyə göndəriləndə də məlumat veriləcək", - Əliyev jurnalistlərin təhsil naziri müavinlərinin işdən çıxarılmasının korrupsiya ilə əlaqəli olması barədə sualına cavabında deyib.