Azərbaycan, Bakı, 14 iyun /Trend, müxbir A.Tağıyeva/
Region ölkələri İranın qonşu ölkələrin işinə müdaxilə etməsinin qarşısını almaq üçün öz səylərini birləşdirməlidirlər. Bu barədə cümə axşamı Trend-ə Səudiyyə Ərəbistanı xarici işlər nazirinin müavini şahzadə Xalid bin Səud bin Xalid bildirib.
"Azərbaycan regionun digər ölkələri kimi İranın onun daxili işlərinə müdaxilə etməsindən əziyyət çəkib. Bu müdaxilənin qarşısının alınması üçün region ölkələri birgə fəaliyyət göstərməlidirlər", - bin Səud deyib.
Onun fikrincə, İran bütün ölkələrin ona heç bir aidiyyəti olmayan daxili işlərinə qarışır.
Şahzadə qeyd edib ki, İran bilməlidir ki, başqa ölkələrin daxili işlərinə müdaxilə etməsi beynəlxalq arenada ona qarşı müsbət rəy yaratmayacaq və onun maraqlarına xidmət etməyəcək, əksinə, ölkəyə və onun xarici siyasətinə xələl gətirəcək.
"Əgər İran qonşu ölkələrlə mehriban qonşuluq münasibətləri qurmaq istəyirsə, başqa ölkələrin işinə müdaxilə siyasətindən imtina etməlidir. İran Bəhreynin işlərinə qarşır, BƏƏ-nin üç adasına iddia edir, Səudiyyə Ərəbistanının və Küveytin daxili işlərinə müdaxilə edir. Tehran, habelə İraqda və Suriyada daxili münaqişələri qızışdırır", - o hesab edir.
Bin Səud qeyd edib ki, Səudiyyə Ərəbistanı və Azərbaycan İranın region ölkələrinin işlərinə müdaxilə etməməsi üçün uğurlu əməkdaşlıq edə bilərlər.
Suriya böhranına toxunan nazir müavini deyib ki, BMT TŞ Suriyada zorakılığa son qoymaq üçün konkret addımlar atmalıdır. Çünki məhz bu təşkilat dünyada təhlükəsizlik üçün cavabdehlik daşıyır.
"Səudiyyə Ərənistanı tələb edir ki, BMT TŞ və Rusiya və Çin kimi ölkələr Suriyada zorakılığın qarşısının alınmasında öz rolunu oynasınlar. Suriyadakı zorakılığı susaraq müşahidə etmək yolverilməzdir", - şahzadə deyib.
O həmçinin qeyd edib ki, Suriyadakı qırğınlara son qoyulmasa, bu ölkədəki vəziyyət bütün regionda irimiqyaslı fəlakətə səbəb ola bilər.
