Azərbaycan, Bakı, 31 may /Trend/
Almaniyanın xarici işlər naziri Gido Vestervelle bəyan edib ki, Rusiyanın Suriya rejiminə silah tədarük etməsi Suriya üzrə sülh konfransının keçirilməsini təhlükə altında qoya bilər. Trend-in məlumatına görə, bu barədə RİA Novosti "Royters" agentliyinə istinadən xəbər verir.
Vestervelle ABŞ dövlət katibi Con Kerri ilə birgə mətbuat konfransında bildirib: "Cenevrədə sülh konfransının keçirilməsini təhlükə altında qoymayın. Əsəd rejiminə silah tədarükü tamamilə səhv addımdır. Rusiyadan olan həmkarlarımız "S-300" raketləri və digər silahlar tədarük etməklə dünyaya və regiona yanlış siqnal verirlər".