Türkiyə Xarici İşlər Nazirliyi Ermənistanla sərhədlərin açılacağı barədə yayılan xəbərlərə aydınlıq gətirib
Azərbaycan, Bakı, 8 noyabr /Trend, müxbir R.Hafizoğlu/
Türkiyə Xarici İşlər Nazirliyi bəzi KİV-də Ermənistanla sərhədlərin açılması istiqamətində guya Azərbaycan tərəfini razı salmaq üçün addımlar atıldığı haqqında gedən xəbərləri təkzib edir. Bu barədə Trend-ə Türkiyənin Azərbaycandakı səfirliyindan məlumat verilib.
Məlumatda qeyd olunur ki, XİN-in mətbuat katibi KİV-də gedən bu kimi xəbərlərin heç bir əsası olmadığını bildirir.
Məlumata əsasən, Türkiyə-Ermənistan danışıqları Azərbaycan-Ermənistan danışıqlarına paralel olaraq aparılır və rəsmi Ankara bunu dəfələrlə bəyan edib.
Məlumatda o da qeyd olunur ki, Türkiyə ATƏT-in Minsk qrupunun fəaliyyətini yaxından izləyir və problemin tez bir zamanda həlli üçün hər bir addımı atmağa hazırdır.
