...

Azərbaycan və Latviya arasında siyasi məsləhətləşmələrin növbəti mərhələsi keçirilib

Siyasət Materials 21 Yanvar 2015 17:33 (UTC +04:00)
Bu gün Xarici İşlər Nazirliyində Azərbaycan və Latviya arasında XİN-lərarası siyasi məsləhətləşmələrin növbəti mərhələsi keçirilib.
Azərbaycan və Latviya arasında siyasi məsləhətləşmələrin növbəti mərhələsi keçirilib

Azərbaycan, Bakı, 21 yanvar /Trend, müxbir Elçin Mehdiyev/

Bu gün Xarici İşlər Nazirliyində Azərbaycan və Latviya arasında XİN-lərarası siyasi məsləhətləşmələrin növbəti mərhələsi keçirilib.

Nazirlikdən Trend-ə verilən məlumata görə, məsləhətləşmələrdə Azərbaycanı xarici işlər nazirinin müavini Xələf Xələfov, Latviyanı isə Xarici İşlər Nazirliyinin dövlət katibi Andres Pildeqoviç təmsil edib.

X.Xələfov Azərbaycanla Latviya arasında ikitərəfli əsasda və bir sıra beynəlxalq və regional təşkilatlar, xüsusilə, Avropa İttifaqı çərçivəsində səmərəli əməkdaşlığın olduğunu qeyd edərək, ölkələrimiz arasında siyasi, iqtisadi, təhsil, kənd təsərrüfatı və digər sahələrdə ikitərəfli münasibətlərin daha da inkişaf etdirilməsi üçün əlverişli imkanların olduğunu bildirib.

İki ölkə arasında münasibətlərin mövcud inkişaf səviyyəsindən razılığını ifadə edən A.Pildeqoviç hazırda Avropa İttifaqı Şurasına sədrlik edən Latviyanın bir sıra tədbirlər keçirməyi planlaşdırdığını və Azərbaycanın sözügedən tədbirlərdə iştirakından məmnun olacaqlarını diqqətə çatdırıb. Yüksəksəviyyəli dövlət rəsmilərinin səfər mübadiləsinin həyata keçirilməsinin ikitərəfli münasibətlərin inkişafında önəmini vurğulayan A.Pildeqoviç cari ildə bir sıra səfərlərin planlaşdırıldığını diqqətə çatdırıb.

Ermənistan-Azərbaycan, Dağlıq Qarabağ münaqişəsi haqqında məlumat verən X.Xələfov Azərbaycan torpaqlarının Ermənistan tərəfindən işğalını, təcavüz və etnik təmizləmə siyasəti nəticəsində bir milyondan çox azərbaycanlının fundamental hüquqlarının pozulduğunu, Avropa İttifaqında bu məsələyə münasibətdə ikili standartlara yol verildiyini, sözügedən münaqişənin regionda sülhə və təhlükəsizliyə ciddi təhdid yaratdığını bildirib. Aİ-nin bütün mövcud münaqişələrə münasibətdə vahid yanaşma göstərməsinin zəruriliyini xüsusilə qeyd edib.

A.Pildeqoviç dövlətlərin ərazi bötüvlüyü və suverenliyinin Latviya üçün fundamental prinsip olduğunu vurğulayıb.

Görüş zamanı qarşılıqlı maraq kəsb edən regional və qlobal məsələlər ətrafında fikir mübadiləsi aparılıb.

Məqalədə:
Xəbər lenti

Xəbər lenti