...

Prezident Vladimir Zelenski Bakı Slavyan Universitetində Ukrayna Tədris-Mədəniyyət Mərkəzi ilə tanış olub (FOTO)

Siyasət Materials 17 Dekabr 2019 18:48 (UTC +04:00)
Azərbaycan Respublikasında rəsmi səfərdə olan Ukrayna Prezidenti Vladimir Zelenski və xanımı Yelena Zelenskaya dekabrın 17-də Bakı Slavyan Universitetinin nəzdində fəaliyyət göstərən Ukrayna Tədris-Mədəniyyət Mərkəzi ilə tanış olublar.
Prezident Vladimir Zelenski Bakı Slavyan Universitetində Ukrayna Tədris-Mədəniyyət Mərkəzi ilə tanış olub (FOTO)

Bakı. Trend:

Azərbaycan Respublikasında rəsmi səfərdə olan Ukrayna Prezidenti Vladimir Zelenski və xanımı Yelena Zelenskaya dekabrın 17-də Bakı Slavyan Universitetinin nəzdində fəaliyyət göstərən Ukrayna Tədris-Mədəniyyət Mərkəzi ilə tanış olublar. Vladimir Zelenskini və xanımını universitetin rektoru Nurlana Əliyeva və həmin mərkəzin rəhbəri Lesya Kərimova müşaiyət ediblər.

Trend-in məlumatına görə, mərkəzin müdiri Lesya Kərimova Prezident Vladimir Zelenskiyə və xanımı Yelena Zelenskayaya burada yaradılan şəraitlə bağlı məlumat verdi.

Bildirildi ki, universitetdə 2001-ci ildə yaradılan Ukrayna Tədris-Mədəniyyət Mərkəzi ölkələrimiz arasında münasibətlərin inkişafına öz töhfəsini verməkdədir. Mərkəz Azərbaycanda Ukrayna mədəniyyətinin təbliğində mühüm rol oynayır. Mərkəzin bazasında ukraynaşünas tələbələr Ukrayna dili və ədəbiyyatını öyrənirlər. Burada, həmçinin müxtəlif mədəni-kütləvi tədbirlər, Ukrayna tarixi və mədəniyyəti ilə bağlı yubiley gecələri keçirilir. Tədris-Mədəniyyət Mərkəzinin nəzdində yaradılan “Slavyanoçka” ansamblı Ukrayna səfirliyinin və Bakı Slavyan Universitetnin təşkil etdiyi müxtəlif mədəni-kütləvi tədbirlərdə iştirak edir.

Lesya Kərimova qeyd edib ki, Mərkəzdə Ukrayna və Azərbaycanın mədəni irsinin öyrənilməsi istiqamətində elmi-tədqiqat işləri aparılır. Mərkəz Ukraynanın ölkəmizdəki səfirliyi, Ukraynanın Azərbaycan diasporu və Ukraynanın ali təhsil müəssisələri ilə sıx əməkdaşlıq edir.

Sonra “Slavyanoçka” ansamblı Ukrayna dilində mahnılar səsləndirdi.

Daha sonra Prezident Vladimir Zelenski və birinci xanım Yelena Zelenskaya Ukrayna diasporunun nümayəndələri ilə görüşdülər.

Diaspor nümayəndələri Azərbaycandakı fəaliyyətləri haqqında Prezidentə məlumat verdilər. Diasporun fəaliyyətini yüksək qiymətləndirən Vladimir Zelenski yaradılan şəraitə görə Azərbaycan Prezidenti İlham Əliyevə minnətdarlığını ifadə etdi.

Məqalədə:
Xəbər lenti

Xəbər lenti