Bakı. Trend:
Artıq bir neçə İsveçrə şirkəti Qarabağın bərpasında iştirak etmək arzusunu bildirib.
Trend xəbər verir ki, bunu İsveçrənin Azərbaycandakı müvəqqəti işlər vəkili Aleksandr Hoffet İsveçrənin Milli Gününə həsr olunan tədbirdə deyib.
"İsveçrənin şirkətləri artıq Azərbaycanda uğurla fəaliyyət göstərir. Azərbaycan Dövlət Neft Şirkəti (SOCAR) bizim bazarda çoxdandır ki mövcuddur. İsveçrə şirkətləri Qarabağın yenidən qurulmasında istifadə etmək üçün öz qabaqcıl texnologiyalarını Azərbaycana verməyə hazırdırlar", - deyə o qeyd edib.
A.Hoffet Azərbaycan ilə İsveçrə arasında ticarət dövriyyəsində nəzərəçarpacaq artım olduğunu vurğulayıb:
"Pandemiyadan sonra birgə iqtisadi komissiyamız nəhayət ki, görüşə bildi. Lakin qeyd etmək lazımdır ki, real potensial hələ də əldə olunmayıb".