Azərbaycanda qarşıdan gələn parlament seçkilərinin demokratik keçirilməsinə ümid var, inam yoxdur. Trend informasiya agentliyi xəbər verir ki, bu ifadələri Avropa Şurası Parlament Assambleyasının (AŞ PA) Monitorinq Komitəsinin Bakıda keçirilmiş iclasından sonra, qurumun Azərbaycan üzrə məruzəçisi , isveçrəli deputat Andreas Qross iyulun 5-də brifinqdə səsləndirmişdir.
Tədbirdə AŞ PA-nın Monitorinq Komitəsinin sədr müavini xanım Severenson, qurumun Azərbaycan üzrə həmməruzəçisi Andres Herkel, AŞ PA-nın Dağlıq Qarabağ münaqişəsi üzrə məruzəçisi Devid Atkinson, eləcə də AŞ PA-dakı Azərbaycan parlament nümayəndə heyətinin rəhbəri Səməd Seyidov iştirak etmişlər.
Milli Məclisdə Seçki Məcəlləsinə əlavə və dəyişiklər müzakirə edilərkən Avropa Şurası Venetiya komissiyasının tövsiyyələrinin, eləcə də seçki komissiyalarının tərkibinin dəyişdirilməsi ilə bağlı müxalifət partiyalarının təkliflərinin nəzərə alınmadığını mənfi hal kimi qeyd edən Andreas Qross, ölkədəki seçkiqabağı vəziyyətdən razı qalmadıqlarını bildirmişdir. O, seçki komissiyalarının tərkibinin qeyri-bərəbər formalaşdırılmasından narahatlıq keçirdiklərini vurğulamışdır.
Seçkilərin taleyinin paytaxtda deyil, Azərbaycanın rayonlarında həll olunacağını qeyd edən həmməruzəçi, bu məqsədlə Azərbaycanın bölgələrinə səfər edəcəklərini bildirmişdir. Gəncə , Qazax, Şəki və Qəbələ rayonlarına səfər etdikdən sonra yenidən Bakıya dönəcəklərini qeyd edən A.Qross, səfərin yekunları ilə bağlı cümə günü KİV üçün mətbuat konfransı keçirəcəklərini söyləmişdir.
Azərbaycanda insan haqları sahəsində bəzi problemlərinin hələ də tam öz həllini tapmadığını qeyd edən AŞ PA-nın Monitorinq Komitəsinin Azərbaycan üzrə digər həmməruzəçisi estoniyalı deputat Andres Herkel, bunların sırasında mitinqlərin keçirməsinə qadağaların olmasını göstərmişdir.
O, fikirlərini isbatlamaq üçün iyulun 2-də müxalifət partiyalarının 17 rayonda keçirmək istədiyi mitinqlərdən yalnız 4-nün baş tutmasını misal çəkmişdir. Həmməruzəçi, daha sonra , İctimai Televiziyanın fəaliyyətə başlamasının uzadılması , iqtidarla müxalifət arasında siyasi debatların keçirilməməsi, eləcə də digər bu kimi problemlərdən narazı qaldıqlarını söyləmişdir.
Dağlıq Qarabağ münaqişəsinin həllinə dair ATƏT-in Minsk qrupu çərçivəsində aparılan danışıqlara Ermənistan və Azərbaycan parlament nümayəndələrinin də qatılmasına ehtiyac duyulduğunu vurğulayan AŞ PA-nın münaqişə üzrə məruzəçisi Devid Atkinson, qurumun qış sessiyasında qəbul olunmuş qətnamənin hər iki ölkənin qanunverici orqanlarında müzakirəsinin təşkil olunmamasını çatışmamazlıq adlandırmışdır.
Mətbuatda A.Qrossa istinadən öz əksini tapmış: " Seçki Məcəlləsinə düzəlişlər etməyən Azərbaycan parlamentinin biabrçıdır" ifadəsinə münasibət bildirən həmməruzəçi onun fikirlərinin təhrif olunduğunu , ümumiyyətlə isə onun leksikonunda "biabırçı" ifadəsinin olmadığını vurğulamışdır.
Sonda yenidən söz alan A.Qross parlamentdəki deputat yerlərinin ən azı 25-nin müxalifət təmsilçilərinə verilməsi fikrində israrlı olduğunu söyləmişdir.
