"Azadlıq" blokunun 5 bölgədə vahid namizədini müəyyən etmək üçün avqustun 12-də Əli Bayramlı, Balakən, Masallı, Qazax və Şəmkirdə ilkin seçki keçiriləcək. Bu barədə Trend ə blokda təmsil olunan Azərbaycan Xalq Cəbhəsi Partiyasını (AXCP-islahatçılar) sədrinin müavini Həsən Kərimov məlumat verib. O bildirib ki, artıq seçki bülletenləri çap olunub, seçki qutuları hazırlanıb.
Bloka daxil olan AXCP, ADP və Müsavat partiyalarının hərəsindən həmin rayonlar üzrə bir nəfərin namizədliyi irəli sürüləcək. İlkin seçkidə 3 namizəd arasında ən çox səs toplayan şəxs "Azadlıq" blokunun parlament seçkisində vahid namizədi olacaq. H.Kərimovun sözlərinə görə, ilkin seçkiyə texniki baxımdan hazırlıq işləri yekunlaşmaq üzrədir.
"Azadlıq" blokunun avqustun 14-də isə Kürdəmir, Zaqatala və Qubada kütləvi aksiyası planlaşdırılır. Bununla bağlı həmin rayonların icra hakimiyyətlərinə müraciət edilib. Lakin yerli müxalifətçilərin məktubuna icra hakimiyyətlərin heç birindən hələ cavab verilməyib.
