Azərbaycan Naminə Hərəkat Füzuli, Qubadlı və Zəngilan rayonlarının ermənilər tərəfindən işğalının ildönümü ilə əlaqədar Bakıda və müxtəlif xarici ölkələrlə tədbirlər keçirəcək.
Bu barədə Trend ə Azərbaycan Naminə Hərəkatdan məlumat verilib.
Hazırda Kanada, Fransa, Norveç və Rusiyada yaşayan həmvətənlərimizlə danışıqlar aparılır, bu ölkələrdə konfrans və anım tədbirlərinin təşkili planlaşdırılır. Yay mövsümü və ali məktəblərdə tətillərlə əlaqədar xarici ölkələrdə azərbaycanlı tələbələrin mitinq və piketlər keçirməsi baş tutmayacaq.
Lakin beynəlxalq təşkilatlara etiraz bəyanatları göndəriləcək, bu sənəddə Ermənistanın işğalçılıq siyasəti, təcavüzkar əməlləri pisləniləcək, beynəlxalq qurumlardan bu ölkəyə qarşı sanksiyaların tətbiq olunması, işğalçıların ərazilərimizi boşaltması üçün konkret işlər görülməsi tələbləri irəli sürüləcək.
Avqustun 31-də isə Bakıda geniş tədbir keçiriləcək, Qubadlının işğalının ildönümü qeyd olunacaq.