Avqustun 23-də Beynəlxalq Mətbuat Mərkəzində (BMM) Vətəndaş Cəmiyyəti Qurucuları Seçki Blokunun seçki qərargahının rəhbəri, Ehtiyatda və İstefada Olan Zabitlər İttifaqının sədri Yaşar Cəfərli və Milli Demokrat Partiyasının sədri, Vətəndaş Cəmiyyəti Qurucuları Seçki Blokunun rəhbəri İskəndər Həmidov mətbuat konfransı keçirib. Trend məlumat verir ki, mətbuat konfransı Yaşar Cəfərlinin seçki qərargahında naməlum şəxslər tərəfindən döyülməsi ilə bağlı keçirilib.
İskəndər Həmidov jurnalistlərin nəzərinə çatdırıb ki, dünən saat 11-də seçki qəraqgahının Yasamal rayonu, Həsən Məcidov küçəsində yerləşən ofisə hücum edənlərin kimliyi təxmini müəyyənləşib. İ.Həmidov: "Biz artıq müəyyənləşdirmişik ki, həmin üç nəfər şəxs qərargahdan təxminən 20 metr aralıda yerləşən ofisdə oturur. Özləri də keçmiş "Qurtuluş" batalyonunun üzvləridirlər".
İ.Həmidov onu da bildirib ki, həmin ofis bəzi hakimiyyət dairələri tərəfindən xüsusilə müxalifətçilərə qarşı zorakılıq məqsədi üçün saxlanılır. "Onu da araşdırmışıq ki, Yaşar Cəfərlini döyənlər bir neçə ay əvvəl "Azadlıq" qəzetinin baş redaktoru Qənimət Zahidovu zorla "Üç palma" restoranına apararaq soyundurub şəkillərini çəkənlərdir. Onları bu yaxınlarda AXCP (i) binasını yumurta atəşinə tutan ilk dəstənin arasında görənlər də olub" - deyə İ.Həmidov bildirib.
Bundan əlavə, İ.Həmidov baş vermiş hadisə ilə bağlı hüquq-mühafizə orqanları tərəfindən cinayət işi başlanmamasından narahatlığını da bildirib. İ.Həmidov: "Ofisə basqın olub, vətəndaşa bədən xəsarətləri yetirilib, avadanlıqlar sındırılıb, Yasamal rayon Polis İdarəsinin rəisi isə bəyan edir ki, əgər ehtiyac olarsa, cinayət işi qaldırılacaq. Ekspertiza müayinəsindən keçmək üçün polis bölməsi tərəfindən Yaşar Cəfərliyə sənəd verilmir. Hətta dünən bölmə işçiləri M.Nağıyev adına xəstəxanaya gediblər.
Növbətçi hissənin işçilərindən qeydiyyat jurnalında Yaşar Cəfərlinin xəsarətləri barədə məlumatı dəyişdirməyi və daha yüngül xəsarət alması barədə saxta məlumat daxil etməyi xahiş ediblər. Bütün bunlar da göstərir ki, qərargaha hücum əvvəlcədən polislə razılaşdırılmış şəkildə həyata keçirilib".
İskəndər Həmidov qərargaha hücum edənlər tərəfindən texniki avadanlıqların sındırılması nəticəsində dəymiş maddi zərərin təxminən 2.000 ABŞ dolları olduğunu bildirib.
