Sentyabrda Azərbaycan Liberal Demokrat Partiyası (ALDP) Ukrayna Liberal Demokrat Partiyası ilə birlikdə Kiyevdə "Liberal Avropa" adlı dəyirmi masa keçirəcək. ALDP sədri Fuad Əliyevin Trend agentliyinə verdiyi məlumata görə, təşəbbüs Azərbaycan tərəfindən olunub.
"Məqsədimiz GUAM dövlətlərinin liberal demokrtalarının birgə forumunu keçirmək idi. Lakin Ukrayna liberal demokratlarının rəhbəri İqor Duşinlə apardığımız söhbətlərdən sonra qərara gəldik ki, bütün Avropa liberal demokratlarını bu masaya dəvət edək", - deyə partiya sədri bildirib. Dəyirmi masada Belorus, İsrail, Moldova və Bolqarıstan Liberal Demokrat Partiya rəhbərlərinin iştirak edəcəyini bildirən F.Əliyev müzakirə olunacaq əsas mövzunun Avropada liberal dəyərlərin qorunmasına aid ediləcəyini qeyd edib.
Partiya sədri onu da əlavə edib ki, toplantıda Dağlıq Qarabağ problemi, Ermənistanın işğalçılıq siyasəti məsələsi də gündəliyə salınacaq. Ermənistanın dəyirmi masada iştirak etməməsinin səbəbinə gəlincə: "Onları özümüz dəvət etməmişik", - deyə F.Əliyev cavab verib.
Rusiya Dövlət Dumasının vitse-spikeri Vladimir Jirinovskinin rəhbəri olduğu Rusiya Liberal Demokrat Partiyası dəyirmi masada müşahidəçi qismində iştirak edəcək. ALDP sədri onu da bildirib ki, dəyirmi masanın keçirilməsində məqsəd "Libintern"ə üzv olmayan dövlətlərin liberal demokrt partiyalarının vahid təşkilatını formalaşdırmaqdır: "Ancaq bu təşkilat "Libintern"ə alternativ olmayacaq".