Sentyabrın 30-da Azərbaycan Respublikası Ali Məhkəməsinin sədri Ramiz Rzayev Litvanın ədliyyə naziri Gintautas Bujinskasın başçılıq etdiyi nümayəndə heyətini qəbul edib. Bu barədə Trend ə Ali Məhkəmənin mətbuat xidmətindən məlumat verilib.
Görüşdə Ali Məhkəmənin sədri Ramiz Rzayev ölkələrimiz arasında ikitərəfli və beynəlxalq təşkilatlar çərçivəsində əlaqələrin uğurla inkişaf etdiyini bildirib. R.Rzayev, həmçinin, son illər respublikamızda dövlətçiliyin möhkəmləndirilməsindən, məhkəmə-hüquq islahatları sahəsində həyata keçirilən tədbirlərdən, eləcə də ədalət mühakiməsini həyata keçirmək, qanunun aliliyini təmin etmək məqsədilə məhkəmələrin qarşısında duran vəzifələrdən danışıb.
Azərbaycan-Litva əlaqələrinin inkişaf səviyyəsindən razılığını ifadə edən məhkəmə sədri əmin olduğunu bildirib ki, cənab Gintautas Bujinskasın Azərbaycana səfəri ölkələrimizin ədliyyə və məhkəmə orqanları arasında əməkdaşlığın inkişafına xidmət edəcək.
Litvanın ədliyyə naziri Gintautas Bujinskas təmsil etdiyi ölkənin ədliyyə orqanlarında görülən işlər barədə danışıb. Nazir ölkələrimizin ədliyyə və məhkəmə orqanlarının sıx əməkdaşlıq etdiyini bildirib. Qonaq bu əməkdaşlığın bundan sonra da davam etdiriləcəyinə əmin olduğunu vurğulayıb.
