...

BƏZİ BÖLGƏLƏRDƏ MÜŞAHİDƏÇİLƏR ÜÇÜN TRENİNQLƏR KEÇİRİLMƏSİNƏ İCAZƏ VERİLMİR

Siyasət Materials 8 Oktyabr 2005 12:51 (UTC +04:00)

Azərbaycanda Vətəndaş Cəmiyyətinin İnkişafına Yardım Assosiasiyası KİV-lərin qarşıdan gələn parlament seçki prosesini işıqlandırılmasının və namizədlərin seçki kampaniyasının monitorinqini həyata keçirir. Bu barədə Trend ə Assosiasiyadan məlumat verilib. Assosiasiya eyni zamanda ona üzv olan təşkilatlar -ABŞ-ın "Mitofsky International" və "Edison Media Research" təşkilatları, Estoniya, Bolqarıstan, Sloveniyadan olan başqa qurumlarla birlikdə ölkənin bütün 125 seçki dairəsində exit-poll tipli sosioloji sorğuların keçirilməsini planlaşdırır və bununla bağlı hazırlıq işləri görür. Exit-poll-un keçirilməsi və seçkilərin müşahidəsinin aparılması üçün Assosiasiya 12 minə qədər müşahidəçi cəlb edib.

Bu müşahidəçilərin hazırlanması üçün təşkilat regionlarda treninqlər keçirməyə başlayıb. Lakin qurumun məlumatına görə, bu prosesə müxtəlif rayon icra hakimiyyətləri tərəfindən maneçilik törədilir. Şəmkir rayonunda, oktyabrın 10-da keçirilməsi nəzərdə tutulan treninqin keçirilməsinə rayon icra hakimiyyətinin başçısı Nazim Veysov icazə verməyəcəyini bildirib. İcra başçısı əsas kimi rəsmi məktubun olmamasını göstərib. Assosiasiya isə hesab edir ki, Seçki Məcəlləsinin, "Dövlət qulluğu haqqında" Qanunun və prezidentin seçki praktikasının təkmilləşdirilməsinə dair sərəncamının tələblərini pozub.

Azərbaycanda Vətəndaş Cəmiyyətinin İnkişafına Yardım Assosiasiyası bu cür hərəkətlərlə bağlı müvafiq dövlət strukturlarından tədbir görülməsini xahiş edib. Bu kimi halların təkrarlanacağı təqdirdə məhkəməyə, dövlət başçısına və beynəlxalq qurumlara müraciət etmək hüququnu özündə saxladığını bəyan edib.

Xəbər lenti

Xəbər lenti