"Yenis Siyasət" seçki bloku eyniadlı siyasi hərəkata çevrilməlidir". Bu barədə Trend ə adıçkəilən blokun təsisçilərindən olan Azərbaycan Ziyalılar Hərəkatının (AZH) rəhbəri Eldəniz Quliyev bildirib.
E.Quliyev qeyd edib ki, Azərbaycan Milli İstiqlal Partiyasının "Yeni Siyasət" seçki blokundan çıxması barədə verdiyi qərar onun üçün gözlənilən olub: "Biz seçki blokunu səmimiyyət üzərində qurmağı qarşımıza məqsəd qoymuşduq. Onu da qeyd etmişdik ki, bu blokdan vasitə kimi istifadə edək, məqsəd kimi yox. Ancaq sonradan AMİP-in məlum addımı onu göstərdi ki, düşündüklərimizi sona qədər həyata keçirə bilmədik".
AZH-nin lideri onu da vurğulayıb ki, noyabrın 7-8-i arasında seçki blokunun Koordinasiya Şurasının iclası keçiriləcək: "Seçki blokunun gələcək fəaliyyətinin müzakirə olunacağı istisna edilmir. Şəxsən mən istərdim ki, blok bundan sonra fəaliyyətini hərəkat çərçivəsində davam etdirsin. Hərəkata bir şəxs rəhbərlik etsin. Onda qarşımıza qoyduğumuz məqsədlərə nail ola bilərik".
