Bu gün saat 15.20 radələrində Salyan rayonu PMK -9 yaşayış massivinin 100-ə yaxın sakini sosial tələblərlə yaşadıqları qəsəbənin yaxınlığından keçən Bakı-Astara avtomobil yolunu bağlamağa cəhd edib. Belə ki, yaşayış massivindəki evlərin bir çoxuna təbii qazın verilməsi dayandırılıb (səbəb kimi qaz pulunun yığıla bilməməsi göstərilərək), elektrik enerjisi gün ərzində 7-8 saat verilsə də, xətlərdəki qapanmalar ucbatından sakinlər ondan da istifadə edə bilmir.
Ərazidəki kanalizasiya sistemi işləmədiyindən küçələr bataqlığı xatırladır. Evlərə verilən içməli su isə kanalizasiya sisteminə qarışdığından kütləvi xəstəliklər təhlükəsi yaranıb.15 dəqiqə sonra aksiya yerinə gələn Salyan rayon İcra Hakimiyyətinin başçısı Rasim Bəşirov etirzçıları yolu bağlamaqdan çəkindirərək, onların tələblərinin çox hissəsinin həlli üçün bir həftə vaxt istəyib. Yalnız bundan sonra aksiya iştirakçıları bildirib ki, tələbləri və onlara verilən vədlər yetirilməzsə, bir həftədən sonra aksiyaya təkrar qayıdacaqlar.
