Kürün aşağı axınında yerləşən Salyan və Neftçala rayonlarının sahil boyu yaşayış məntəqələri artıq 4-cü ildir ki, qrunt sularından əziyyət çəkir. Problemin həlli hər iki rayonun maliyyə imkanları daxilində olmadığı üçün respublika hökumətinə müraciət edilib. Fevralın əvvəllərində Nazirlər Kabinetində təsdiqlənən sənədə əsasən, hər iki rayonda yerüstü kanalizasiya sisteminin çəkilməsi, Kürün ana qolunda və dənizə tökülən boğazda su hövzəsinin genişləndirilməsi, həmçinin, lildən təmizlənməsi, bir sözlə, Kürdə suyun səviyyəsinin aşağı olması üçün tədbirlər həyata keçirmək nəzərdə tutulur.
Hazırda Kürün mənsəbində yenidən təmizləmə işlərini başa çatdıran lil sovuran "İnam" gəmisi 2,6 km uzunluğu olan yeni qazılan qolda dərinləşdirmə işləri aparır. Kanalın dərinliyinin 2 metr artırılaraq 3 metrdən 5 metrə çatdırılması nəzərdə tutulub. Bu sahədə işlərə ötən ilin dekabrından başlanılıb, artıq qolun 450 metri dərinləşdirilib.
Salyan rayon icra hakimiyyətinə bildirildiyinə görə, fevralın 21-də Respublika fövqəladə komissiyası rayona gələcək. Mütəxəssislər Kürün Salyan şəhəri ərazisindən keçən hissəsində yatağın istiqamətinin 2,5 km dəyişdirilməsi üzərində araşdırmalar aparacaq. Belə ki, bu baş tutarsa, şəhərin əksər hissəsi çayın sahilində yerləşməyəcək. Onu da qeyd edək ki, çayın yatağının bu il ərzində dəyişdiriləcəyi gözlənilir. Nazirlər Kabineti lazım olan vəsaiti ayıran kimi işlərə bşlanılacaq.