Dünən Gəncə Avtomobil Zavodunun Naxçıvan Muxtar Respublikasında daimi nümayəndəliyi açılıb. Bu barədə məlumatı zavodun mətbuat xidməti yayıb. Mətbuat xidməti zavodun direktor müavini Musa Abdullayevə istinadən bildirib ki, nümayəndəliyin rəsmi açılış mərasimində NMR Ali Məclisinin sədri Vasif Talıbov və digər rəsmi şəxslər iştirak ediblər. Tədbirdə GAZ-ın Naxçıvan Muxtar Respublikadakı nümayəndəliyinin fəaliyyəti yüksək qiymətləndirilib. Zavodun direktoru Xanlar Fətiyevin nümayəndəlikdə avtomobillərin yığım sexinin yaradılması təklifi NMR rəhbəliyi tərəfindən müsbət qarşılanıb və qeyd olunub ki, yaxın vaxtlarda nümayəndəliyinin ərazisində tikiləcək yeni yığım sexinin smeta layihəsi hazırlanacaq.
Məlumat üçün bildirək ki, əsası 2005-ci ilin oktyabrında qoyulan nümayəndəliyin 3450 kv metr ərazisində bərpa-təmir işləri aparılıb, 432 kv metr ərazidə isə yeni bina tikilərək müasir avadanlıqlarla təmin edilib.
Bu günədək nümayəndəliyin tikinti və təmirində 80 nəfərə yaxın insan müvəqqəti işlə təmin olunub. Nümayəndəlikdə hazırda 10 nəfər daimi iş yeri tapıb. Gələcəkdə burada ümumilikdə 35-40 nəfərlik yeni iş yerlərinin açılacağı planlaşdırılır.
