Bərdə-Tərtər magistral avtomobil yolunu Səfərovlar ailəsi 1 saata yaxın bağlayıb. Trend in regional müxbiri xəbər verir ki, yolun bağlanma səbəbini Səfərovlar belə izah edib: "26 aprel 2006 -cı ildə axşam saat 23:30 radələrində həmin istiqamətdə hərəkət edən yolda 1956-cı il təvəlüdlü Səfərov Eldar Paşa oğlu 011 markalı "Jiquli" avtomobili ilə yaxın dostu Məhərəmmov Mənsumu görüb, avtomobili onun yanında saxlayıb. Mənsumun avtomobilində yaranan texniki nasazlığı düzəltməsinə kömək etdikdən sonra E.Səfərov müəyyən olmayan səbəblərə görə avtomobil düzələn yerdə dünyasını dəyişib".
Mərhumun yaxın qohumları E.Səfərovun ölməsinin səbəbini iki versiya ilə əlagələndirir. Birincisi, E.Səfərovu avtomobil vurub, ikincisi, o, küt alətlə öldürülüb. Artıq 8 aydır ki, 50 yaşlı E.Səfərovu öldürən cinayətkarı Tərtər rayon polis şöbəsi tapmayıb. Bununla bağlı dəfələrlə Tərtər rayon polis şöbəsinə, Tərtər rayon prokurorluğuna və Daxili İşlər Nazirliyinə müraciət etsələr də, heç bir nəticə yoxdur. Bərdə və Tərtər rayon polis şöbəsinin əməkdaşları aksiyanı dağıdıb yolun açılmasına cəhd etsələr də, bu baş tutmayıb. Nəhayət, 45-50 dəqiqədən sonra aksiya iştirakçılarının yanına Tərtər rayon prokuroru Seyidəli Məcidov gəlib, mərhumun yaxınları ilə danışıqlar aparıb, bildirib ki, faktla bağlı cinayət işi açılıb, araşdırma aparılır. Yaxın vaxtlarda ciayətkar cəzasına çatacaq. Bundan sonra Səfərovlar aksiyanı dayandırıb, yolu açıblar.