Şəhərimizdə ötən il 4942 nəfər diabetli xəstə qeydə alındığı halda, cari ilin 10 ayı ərzində bu rəqəm 5344 nəfərə çatıb.
Şəhər Endokrinoloji Xəstəxananın baş həkimi Süleyman Piriyevin sözlərinə görə, irsi amillərlə yanaşı, ətraf mühitin çirklənməsi də diabetli xəstələrin sayının artmasına səbəb olur: "Bu il diabetli xəstələrin sayı ötən illərlə müqayisədə artmaqdadır. Artım sürəti belə davam edərsə, gələn il diabetli xəstələrin sayı iki dəfə artaraq 10 min nəfərə çata bilər. Şəkərin bu cür templə artması qida məhsullarının keyfiyyətinin aşağı olması və havanın çirklənməsi ilə birbaşa əlaqədardır".
Baş həkimin sözlərinə görə, şəkər də digər endokrinoloji xəstəliklər kimi orqanizimdə maddələr mübadiləsinin pozulması nəticəsində yarandığından, son zamanlar kökəlməyə meyilli insanlarda diabetə düçar olma halları daha çox müşahidə olunmaqdadır. Bunun üçün də kökəlməyə meyilli insanların öz qida rasionlarına diqqət yetirmələri və pəhriz saxlamaları labüddür.
Şəkər əsasən yaşlı nəsildən olan insanlarda qeydə alınsa da, son illər şəhərimizdə bu xəstəlikdən əziyyət çəkənlər arasında gənclərin də sayı artmaqdadır. Bu il yeni qeydə alının şəkərli xəstələrin 18 nəfəri uşaqdır.